جموں, 30 اکتوبر (ہ س)۔ گزشتہ چند ماہ سے مسلسل بارش اور مختلف مقامات پر پانی جمع ہونے کے باعث شمالی ریلوے کے جموں ڈویژن میں ٹرین سروسز شدید طور پر متاثر ہوئیں، جس کے نتیجے میں متعدد ٹرینیں منسوخ یا مختصر روٹس پر محدود کر دی گئیں۔ اب موسم میں بہتری اور حالات کے معمول پر آنے کے بعد ریلوے حکام نے پٹریوں کا تفصیلی معائنہ شروع کر دیا ہے تاکہ ٹرینوں کی باقاعدہ آمد و رفت بحال کی جا سکے۔

محکمہ ریلوے کے مطابق چھٹے مرحلے میں متعدد ٹرینوں کی بحالی عمل میں لائی جا رہی ہے۔سینئر ڈویژنل کمرشل منیجر اُچت سنگھل نے بتایا کہ ان ٹرینوں کو صرف اس وقت بحال کیا جا رہا ہے جب ریلوے ٹریکس کی مکمل حفاظت اور تسلسل کی تصدیق ہو گئی ہو۔ انہوں نے کہا کہ بحالی کے پانچ مراحل پہلے ہی مکمل ہو چکے ہیں اور یہ چھٹا مرحلہ ٹرین سروسز کو مکمل طور پر معمول پر لانے کی سمت ایک اہم پیش رفت ہے۔

اُچت سنگھل نے مسافروں سے اپیل کی کہ وہ سفر سے قبل شمالی ریلوے کی آفیشل ویب سائٹ یا سرکاری ہیلپ لائن نمبرز پر تازہ شیڈول چیک کریں تاکہ کسی بھی ممکنہ دقت سے بچا جا سکے۔

ہندوستھان سماچار

---------------

ہندوستان سماچار / محمد اصغر