تہران،24اکتوبر(ہ س)۔

ایران کے وزیر خارجہ عباس عراقچی نے بین الاقوامی ایجنسی برائے ایٹمی توانائی (آئی اے ای اے) کے ڈائریکٹر رافائیل گروسی کے اس بیان پر سخت رد عمل دیا، جس میں گروسی نے اشارہ دیا تھا کہ اگر ایران کے جوہری پروگرام سے متعلق سفارتی کوششیں ناکام رہیں تو طاقت کے استعمال کا امکان بھی ہے۔عراقچی نے جمعرات کو صحافیوں سے گفتگو میں سوال کیامجھے نہیں معلوم کہ گروسی نے یہ بات ہماری لیے تشویش میں کہی یا دھمکی کے طور پر۔عراقچی نے مزید خبردار کرتے ہوئے کہا جو لوگ ایسی دھمکیاں دیتے ہیں، انھیں یہ سمجھنا چاہیے کہ ایک ناکام تجربے کو دہرانا صرف نئی ناکامی کی طرف لے جائے گا۔اس سے قبل گروسی نے بدھ کو سوئس اخبار لو تان کے ساتھ گفتگو میں ایران کے جوہری معاملے میں سفارتی ناکامی کے امکانات پر اپنی تشویش ظاہر کی تھی۔ گروسی کا کہنا تھا اگر سفارت کاری ناکام ہو گئی، تو مجھے خدشہ ہے کہ ایران کے جوہری مقامات کے خلاف دوبارہ طاقت استعمال ہو سکتی ہے۔گروسی نے مزید بتایا کہ ایران کے پاس تقریباً دس جوہری بم بنانے کے لیے کافی ایندھن موجود ہے، تاہم انہوں نے یہ بھی واضح کیا کہ ایجنسی کے پاس اس بات کا کوئی ثبوت نہیں کہ تہران اسلحہ حاصل کرنے کی کوشش کر رہا ہے۔

یاد رہے کہ ایران نے جولائی 2025 میں آئی اے ای اے کے ساتھ تعاون معطل کر دیا تھا جس کا پس منظر یہ ہے کہ جون میں ایران اور اسرائیل کے درمیان 12 روزہ جنگ ہوئی۔ اس میں اسرائیل نے غیر معمولی حملے کیے، خاص طور پر ایران کے فوجی اور جوہری مقامات کو نشانہ بنایا اور امریکہ نے بھی اندرون ایران جوہری مراکز پر حملے کیے۔ تہران نے اسرائیلی حملوں کے لیے ایٹمی ایجنسی کو بھی جزوی ذمہ دار ٹھہرایا اور الزام لگایا کہ ایجنسی نے اس کے جوہری مقامات پر اسرائیلی حملوں کی مذمت نہیں کی۔ایران واحد غیر جوہری ملک ہے جو یورینیم کو 60 فی صد تک افزودہ کرتا ہے، جو کہ ایک جوہری بم بنانے کے لیے ضروری 90 فی صد کی ٹیکنیکل حد کے قریب ہے۔

ہندوستھان سماچار

ہندوستان سماچار / Mohammad Khan