نئی دہلی، 13 اکتوبر (ہ س)۔ منگولیا کے صدر کھریل سکھ اکھنا ہندوستان کے سرکاری دورے پر آج یہاں پہنچے۔ ایئرپورٹ پر ان کا شاندار استقبال کیا گیا۔ وزیر خارجہ ڈاکٹر ایس جے شنکر نے کل وزیر اعظم نریندر مودی کے ساتھ اپنی بات چیت سے قبل آج ان سے ملاقات کی۔

وزیر خارجہ ڈاکٹر جے شنکر نے ایک ایکس پوسٹ میں کہا کہ ہندوستان کے سرکاری دورے کے دوران منگولیا کے صدر کھریل سکھ اکھنا سے ملنا اعزاز کی بات ہے۔ انہوں نے روحانی پڑوسیوں اور عالمی جنوب کے اراکین کے طور پر ہماری اسٹریٹجک شراکت داری کو آگے بڑھانے کے لیے ان کے پرجوش وژن کی تعریف کی۔ انہیں یقین ہے کہ کل وزیر اعظم مودی کے ساتھ ان کی بات چیت ہماری دوستی کے اگلے عشرے کے لیے مستقبل کی سمت متعین کرے گی۔

صدر اکھنا 13 سے 16 اکتوبر تک ہندوستان کے سرکاری دورے پر ہیں۔ ان کے ساتھ کابینہ کے وزراء، ارکان پارلیمنٹ، سینئر حکام، تاجر رہنما اور ثقافتی نمائندوں پر مشتمل ایک اعلیٰ سطحی وفد بھی ہے۔ منگولیا کے سربراہ کی حیثیت سے صدر کھریل سکھ کا یہ ہندوستان کا پہلا دورہ ہے۔

دورے کے دوران وہ صدر دروپدی مرمو سے ملاقات کریں گے اور ان کے اعزاز میں ضیافت کا اہتمام کیا جائے گا۔ کل، صدر کھریل سکھ وزیر اعظم مودی کے ساتھ بات چیت کریں گے اور دو طرفہ تعلقات کے تمام پہلوؤں کا جائزہ لیں گے۔

قابل ذکر ہے کہ ہندوستان اور منگولیا کے درمیان سفارتی تعلقات 1955 میں قائم ہوئے تھے۔ گزشتہ سات دہائیوں کے دوران دونوں ممالک نے مشترکہ ثقافتی اور روحانی تعلقات اور جمہوری اقدار پر مبنی قریبی اور کثیر جہتی شراکت داری کو فروغ دیا ہے۔ یہ شراکت داری دفاع اور سلامتی، پارلیمانی تبادلے، ترقیاتی شراکت داری، توانائی، کان کنی، انفارمیشن ٹیکنالوجی، تعلیم، صحت کی دیکھ بھال اور ثقافتی تعاون جیسے شعبوں پر محیط ہے۔

---------------

ہندوستان سماچار / عبدالسلام صدیقی