جے پور، 9 جنوری (ہ س)۔ راجستھان میں جمعہ سے بارش کا دور شروع ہونے کا امکان ہے۔ محکمہ موسمیات نے بیکانیر، جے پور، بھرت پور اور اجمیر ڈویژن کے کچھ حصوں میں 10 اور 11 جنوری کو ہلکی سے درمیانی بارش کی وارننگ جاری کی ہے۔ اس کے علاوہ 11 جنوری کو سیکر، چورو، جھنجھنو اور الور میں الگ الگ مقامات پر تیز بارش اور ژالہ باری کا امکان ہے۔ محکمہ نے 11 جنوری کو چھ اضلاع میں بارش اور ژالہ باری کے لیے اورنج الرٹ جاری کیا ہے۔ 12 جنوری سے ریاست میں گھنی دھند پڑنے کا امکان ہے۔

ریاست میں گزشتہ 24 گھنٹوں میں جیسلمیر، باڑمیر، جے پور، اجمیر سمیت کئی شہروں میں زیادہ سے زیادہ درجہ حرارت میں 2 سے 4 ڈگری سیلسیس کا اضافہ ہوا ہے۔ بدھ کو باڑمیر میں سب سے زیادہ درجہ حرارت 27.2 ڈگری سیلسیس تھا۔ دیگر شہروں میں درجہ حرارت اس طرح ریکارڈ کیا گیا: جیسلمیر 27 ڈگری، بیکانیر 25.6، چتوڑ گڑھ 25.2، جالور 25.7، اجمیر 23.4، پیلانی 23.9، ادے پور 23.4، جودھ پور 24.5، گنگا نگر 23 اور چورو 23.7 ڈگری سیلسیس۔ جے پور، اجمیر اور بیکانیر جیسے شہروں میں دن کے وقت آسمان صاف رہا اور تیز دھوپ کھلی جس سے لوگوں کو سردی سے راحت ملی۔ تاہم کم سے کم درجہ حرارت میں کمی کے باعث صبح اور شام سردی رہی۔

بدھ کو ریاست کے کئی شہروں میں کم سے کم درجہ حرارت 10 ڈگری سیلسیس سے نیچے درج کیا گیا۔ سب سے کم درجہ حرارت سیکر کے فتح پور میں 1.1 ڈگری سیلسیس اور سیروہی کے ماو¿نٹ آبو میں 1.2 ڈگری سیلسیس ریکارڈ کیا گیا۔ کم سے کم درجہ حرارت میں کمی کی وجہ سے صبح اور رات کو شدید سردی محسوس کی گئی۔

ہندوستھان سماچار

ہندوستان سماچار / محمد شہزاد