پاکستانی ڈرون کی ہندوستانی حدود پر داخلے پر فوج نے فائرنگ کی

جموں، 22 جنوری (ہ س)۔ جموں و کشمیر کے ضلع پونچھ میں لائن آف کنٹرول (ایل او سی) کے قریب بدھ کی علی الصبح پاکستانی ڈرون نے بھارتی حدود میں دراندازی کی کوشش کی، جسے بھارتی فوج نے فوری اور مؤثر کارروائی کرتے ہوئے ناکام بنا دیا۔

حکام کے مطابق، یہ ڈرون مینڈھر سیکٹر میں سرحدی باڑ کے قریب بھارتی فضائی حدود میں داخل ہوا۔ فوجی اہلکاروں نے رات تقریباً 1 بجے اس کی نقل و حرکت کا پتہ لگایا اور اس پر تقریباً ایک درجن فائر کیے، جس کے بعد ڈرون مختصر وقت تک فضا میں منڈلاتے ہوئے واپس مقبوضہ کشمیر کی جانب لوٹ گیا۔

علاقے میں ممکنہ خطرات کو مدنظر رکھتے ہوئے صبح کی روشنی کے ساتھ ہی ایک بڑے پیمانے پر سرچ آپریشن کا آغاز کیا گیا تاکہ یہ یقینی بنایا جا سکے کہ ڈرون کے ذریعے کسی قسم کا اسلحہ، منشیات یا دیگر ممنوعہ اشیاء نہ گرائی گئی ہوں۔آخری اطلاعات تک تلاشی مہم جاری تھی، اور فوج پوری مستعدی کے ساتھ حالات پر نظر رکھے ہوئے ہے تاکہ کسی بھی غیر معمولی سرگرمی کا بروقت سدباب کیا جا سکے۔

ہندوستھان سماچار

--------------

ہندوستان سماچار / محمد اصغر