دہرادون، 24 اپریل (ہ س)۔ بھارتیہ جنتا پارٹی کے اتراکھنڈ کے انتخابی کوآرڈینیٹر اور بی جے پی کے معاون خزانچی اورراجیہ سبھا کے رکن نریش بنسل نے کانگریس کو کانگریس پارٹی کے انتخابی منشورکواکثریتی طبقے کی جائیداد پر قبضہ کرنے والا قرار دیا ہے۔ انہوں نے کہا ہے کہ عوام انتخابات میں ووٹ کے ذریعے کانگریس کے ارادوں کو خاک میں ملا دیں گے۔

بدھ کو ریاستی صدر دفتر میں، نریش بنسل نے کہا کہ کانگریس نے گزشتہ چھ دہائیوں سے جس خوشامدی منصوبہ کو مکمل کرنے کی کوشش کی تھی اور جو مکمل نہیں ہو سکی، وہ اپنے منشور اور بیانات کے ذریعے نافذ کرنا چاہتی ہے۔ نریش بنسل نے کہا کہ کانگریس جانتی ہے کہ ان کے لیے اقتدار میں آنا ممکن نہیں ہے، لیکن کانگریس اکثریتی سماج کو نظر انداز کرنے کی پالیسی کے لیے کوئی موقع نہیں چھوڑنا چاہتی۔ نریش بنسل نے کہا کہ وزیر اعظم نے کانگریس کے انتخابی منشور اور اس کے پوشیدہ عزائم کو منظر عام پر لادیا ہے جس کی وجہ سے انڈیا اتحاد میں زبردست کھلبلی مچی ہوئی ہے۔ وہ براہ راست اور بالواسطہ طور پر وزیر اعظم کو گھیرنے کی ناکام کوششیں کر رہے ہیں۔

بنسل نے کہا کہ گزشتہ چھ دہائیوں میں کانگریس نے صرف ایک خاص طبقے کو خوش کیا ہے۔ 2024 کے لیے بھی، ترقی کے ایجنڈے کے بجائے، کانگریس نے پھر سے خوشامد کرنے کا وہی راستہ اختیار کیا ہے۔ وزیر اعظم نریندر مودی نے اپنی مختلف انتخابی مہموں کے دوران کہا ہے کہ کانگریس کی توجہ عام آدمی کی کمائی پر ہے جہاں کانگریس اپنی موجودگی قائم کرنا چاہتی ہے۔ انہوں نے کہا کہ کانگریس اور اس کی اتحادی سیاسی جماعتوں کی پوزیشن آپ کی زمین، آپ کی جائیداد، آپ کی دولت اور یہاں تک کہ خواتین کے حوالے سے بھی اچھی نہیں ہے۔ وہ اسے عوام سے چھیننا چاہتے ہیں۔ اس تناظر میں راہل گاندھی نے کہا ہے کہ وہ جائیدادوں کا ایکسرے کروائیں گے۔

انہوں نے کہا کہ کچھ جگہوں پر کانگریس اکثریت پر حملہ کرتی ہے اور دوسری جگہوں پر وہ اقلیتوں کو ایس سی، ایس ٹی، او بی سی کا ریزرویشن دیتی ہے۔ کرناٹک اور کیرالہ جیسی ریاستوں میں بھی ایسا ہی کیا گیا ہے جہاں او بی سی کا چھ فیصد ریزرویشن مسلمانوں کو دینے کی کوشش کی گئی تھی، جو عدالت کی وجہ سے کامیاب نہیں ہوئی، ورنہ کانگریس نے کوئی کسر نہیں چھوڑی تھی۔

پریس کانفرنس میں ریاستی جنرل سکریٹری آدتیہ کوٹھاری، معاون میڈیا انچارج راجندر سنگھ نیگی، ڈاکٹر آر پی رتوری، کملیش رمن وغیرہ موجود تھے۔

ہندوستھان سماچار/ عبد الواحد