نئی دہلی، 29 مارچ (ہ س)۔

بھارتیہ جنتا پارٹی (بی جے پی) نے کانگریس پارٹی کو نشانہ بناتے ہوئے کہا کہ کوئی بھی ملک کے آئین اور قانون سے بالاتر نہیں ہے۔ بی جے پی نے کہا کہ کانگریس پارٹی سمجھتی ہے کہ وہ ملک کے آئین اور قانون سے بالاتر ہے۔ وہ ٹیکس ڈیفالٹر بن سکتی ہے، جھوٹ بول سکتی ہے اور پھر مظلومیت کا کارڈ کھیل سکتی ہے۔ اس کے باوجود ملک کے قانون سے کوئی بالاتر نہیں۔

کانگریس کو آئی ٹی نوٹس پر بی جے پی کے قومی ترجمان شہزاد پونا والا نے میڈیا سے بات کرتے ہوئے کہا کہ عام لوگوں کو ٹیکس دینا پڑتا ہے لیکن کانگریس خود کو خصوصی وی وی آئی پی کیٹیگری میں رکھتی ہے۔ جب ان کی 'چوری' پکڑی گئی تو وہ ٹیکس نہیں دینا چاہتے تھے۔ سوال یہ ہے کہ جب انہیں 2021 میں نوٹس موصول ہوا تو انہوں نے اسے چیلنج کرنے میں تاخیر کیوں کی۔ اب جب آپ کو چیلنج کیا گیا تو آپ کو کوئی راحت نہیں ملی۔ پونا والا نے کہا کہ کانگریس نے وزیر اعظم نریندر مودی اور بی جے پی کی مخالفت کرتے ہوئے اب ملک کے اداروں پر حملہ کرنا شروع کر دیا ہے۔ یہ کانگریس کی مایوسی کی سطح کو ظاہر کرتا ہے۔

کانگریس پر حملہ کرتے ہوئے پونا والا نے کہا کہ کانگریس ایم پی دھیرج ساہو کے احاطے میں 350 کروڑ روپئے ملے ہیں۔ ان کے 50 اراکین پارلیمنٹ کے پاس مجموعی طور پر بہت پیسہ ہوگا۔ یہ پیسے کی کمی نہیں ہے، یہ کانگریس پارٹی میں امیدواروں اور ارادوں کی کمی ہے۔

ہندوستھان سماچار

/عطاءاللہ