میں نے ابھی تک ریٹائرمنٹ کے بارے میں نہیں سوچا : لیونل میسی
واشنگٹن، 28 مارچ (ہ س)۔ ارجنٹینا کے مایہ ناز فٹبالر لیونل میسی نے ابھی تک ریٹائرمنٹ کے بارے میں نہیں سوچا ہے اور ان کا کہنا ہے کہ ان کے کھیل کیرئیر کو ختم کرنے کے فیصلے میں عمر فیصلہ کن عنصر نہیں ہوگی۔
36 سالہ کھلاڑی نے کہا کہ وہ اپنے کیریئر کا خاتمہ اسی صورت میں کریں گے جب وہ محسوس کریں کہ وہ اپنا تعاون دینے سے قاصر ہیں۔ میسی نے بدھ کے روز بگ ٹائم پوڈکاسٹ کو انٹرویو دیتے ہوئے کہا، ’’مجھے پتہ ہے کہ جس لمحہ مجھے لگے گا کہ میں اب پرفارم نہیں کر رہا ہوں، میں اس سے لطف اندوز نہیں ہو رہا ہوں اور نہ ہی اپنے ساتھیوں کی مدد کر رہا ہوں، میں ریٹائر ہو جاؤں گا۔‘‘
انہوں نے کہا، ’’میں بہت خود تنقیدی ہوں، میں جانتا ہوں کہ میں کب اچھا کر رہا ہوں، کب نہیں، کب میں اچھا کھیلتا ہوں اور کب خراب کھیلتا ہوں۔ جب مجھے لگے گا کہ یہ قدم اٹھانے کا وقت آگیا ہے تو میں عمر کے بارے میں بغیر سوچے سمجھے ایسا کروں گا۔ اگر مجھے اچھا لگتا ہے تو میں مقابلہ جاری رکھنے کی کوشش کروں گا کیونکہ یہ وہی ہے جو مجھے پسند ہے اور میں جانتا ہوں کہ اسے کیسے کرنا ہے۔‘‘
اپنی کپتانی میں ارجنٹینا کو قطر میں 2022 فیفا ورلڈ کپ خطاب دلانے والے میسی نے کہا کہ انہوں نے وہ سب کچھ حاصل کیا ہے جس کی فٹ بال میں توقع تھی۔ ورلڈ کپ میں میسی نے فرانس کے خلاف فائنل میں دو گول کیے اور ٹورنامنٹ کے بہترین کھلاڑی کو دی جانے والی گولڈن بال جیتی۔
آٹھ بار کے بیلن ڈی اور جیتنے والے نے کہا کہ میں نے ابھی تک ریٹائرمنٹ کے بارے میں نہیں سوچا ہے۔ اس وقت میں مستقبل کے بارے میں سوچے بغیر ہر دن، ہر لمحے سے لطف اندوز ہونے کی کوشش کرتا ہوں۔ میرے پاس ابھی تک کچھ بھی واضح نہیں ہے۔ مجھے امید ہے کہ میں کچھ دیر تک کھیلتا رہوں گا، کیونکہ مجھے اسی میں لطف آتا ہے۔ جب وقت آئے گا، میں یقینی طور پر ایک نئے کردار کا راستہ تلاش کروں گا۔‘‘
میسی نے اپنے موجودہ کلب انٹر میامی کے لیے 19 میچوں میں 16 گول کیے ہیں اور سات اسسٹنٹ فراہم کیے ہیں۔ وہ اس کلب میں گزشتہ جولائی میں پیرس سینٹ جرمین سے مفت ٹرانسفر پر شامل ہوئے تھے۔
ہندوستھان سماچار
/شہزاد
