ایتھنز، 27 اپریل (ہ س)۔ یونان نے جمعہ کو ایتھنز کے پیناتھینک اسٹیڈیم میں منعقدہ ایک علامتی تقریب کے دوران باضابطہ طور پر پیرس 2024 کی آرگنائزنگ کمیٹی کے ایک وفد کو اولمپک مشعل سپرد کی۔ یہ وہی مقام ہے جہاں پہلی بار 1896 میں جدید اولمپکس کھیلے گئے تھے۔
سمر اولمپکس اس سال 26 جولائی سے 11 اگست تک پیرس میں منعقد ہوں گے۔
پیرس 2024 کی آرگنائزنگ کمیٹی کے صدر ٹونی ایسٹانگوئٹ نے ایتھنز کے پیناتھینک اسٹیڈیم میں اولمپک مشعل حاصل کی۔ اس کے ساتھ ہی یونان میں 11 روزہ اولمپک ریلے پروگرام ختم ہو گیا۔ اب اولمپک مشعل فرانس جائے گی جہاں 8 مئی سے ریلے کا اہتمام کیا جائے گا۔
اس دوران ہیلینک اولمپک کمیٹی کے صدر اسپیروس کیپرالوس نے ایک جذباتی خطاب کیا، جس میں انہوں نے قومی ریلے کے دوران مشعل کے پرتپاک استقبال پر اپنے ہم وطنوں کا شکریہ ادا کیا اور فرانس کے لیے اپنی نیک خواہشات پیش کیں۔
اولمپک کی آفیشل ویب سائٹ نے کیپرالوس کے حوالے سے کہا، ’’ہجوم سے بھرے پیناتھینک اسٹیڈیم میں، امید اور فخر کا ایک انوکھا سفر، جس نے پورے یونان کو ایک سرے سے دوسرے سرے تک روشن کر دیا ہے، اختتام کو پہنچا۔ یہ 11 دن جنہوں نےہمارے ملک کو مسحور کر دیا ہے اور پوری دنیا کی توجہ حاصل کی ہے، یہ 2024 میں پیرس میں ہونے والے اگلے اولمپک گیمز کے لیے ایک عظیم سفر کا آغاز ہے۔‘‘
اس کے بعد پیرس 2024 کی آرگنائزنگ کمیٹی کے صدر ٹونی ایسٹانگوئٹ (ایف آر اے) نے ایک تقریر کی جس میں انہوں نے مشعل روشن کرنے اور ہینڈاوور تقریب دونوں کے انعقاد کے لیے یونانی عوام کے ساتھ ساتھ ہینڈ اوور پروگرام کے فرانسیسی علمبردار پاپاڈاکس اور ہیس دونوں کا شکریہ ادا کیا۔
بحیرہ روم کو عبور کرنے کے بعد اولمپک مشعل 8 مئی کو مارسلے میں فرانسیسی سرزمین پر پہنچے گی۔
ہندوستھان سماچار//سلام
