حیدرآباد، 16 ستمبر (ہ س)۔ آندھرا پردیش کے وزیر اعلیٰ این چندرا بابو نائیڈو نے بدھ کو کہا کہ تیروملا تیرپتی دیوستھانم (ٹی ٹی ڈی) نے لائف انشورنس کارپوریشن آف انڈیا (ایل آئی سی) کے ساتھ مل کر تیروملا آنے والے ہر عقیدت مند کو بیمہ کی سہولت فراہم کرنے کا فیصلہ کیا ہے۔ اس کے تحت سفر کے دوران قدرتی وجوہات سے موت ہونے کی صورت میں اہل خانہ کو دو لاکھ روپے کی مالی امداد دی جائے گی۔ ٹی ٹی ڈی نے عقیدت مندوں کو آدھار پر مبنی آن لائن بیمہ سہولت سے جوڑنے کا فیصلہ کیا ہے۔

نائیڈو نے ٹی ٹی ڈی حکام کے ساتھ جائزہ اجلاس کے بعد پریس کانفرنس میں یہ معلومات دی۔ انہوں نے کہا کہ عقیدت مندوں کی سلامتی اور سہولت کو مدنظر رکھتے ہوئے بیمہ اسکیم کے ساتھ ساتھ تیروملا اور تروپتی میں کئی دیگر ترقیاتی اور یاتری سہولیات سے متعلق منصوبے بھی شروع کیے جا رہے ہیں۔

وزیر اعلیٰ نے ایس وی میوزیم کا افتتاح بھی کیا۔ انہوں نے بتایا کہ میوزیم کو ٹی سی ایس ٹرسٹ نے 104 کروڑ روپے کی لاگت سے تیار کیا ہے اور آئندہ پانچ برسوں تک یہی ٹرسٹ اسے چلائے گا۔ انہوں نے بتایا کہ ویکنٹھم کمپلیکس-1 میں ’دُرلبھ درشن‘ کے نام سے ایک ہیلنگ ایکسپیرینس سینٹر قائم کیا گیا ہے۔ اس میں مندر کی تاریخ اور بھگوان وینکٹیشور کی عظمت کو پیش کیا جائے گا۔

عقیدت مندوں کی سہولت کے لیے ریلائنس فاؤنڈیشن نے 25 الیکٹرک بسیں عطیہ کی ہیں، جبکہ سات بسیں بھارت بایوٹیک کی جانب سے فراہم کی گئی ہیں۔ وزیر اعلیٰ نے نارائن گری سرکل پر ان بسوں کو ہری جھنڈی دکھا کر روانہ کیا۔

نائیڈو نے کہا کہ حکومت شری وانی ٹرسٹ کے ذریعے 5,000 مندروں کی تعمیر کے منصوبے پر کام کر رہی ہے۔ انہوں نے بتایا کہ ریاست کے 65 مندر ٹی ٹی ڈی سے وابستہ ہیں۔

وزیر اعلیٰ نے کہا کہ دنیا کے ان شہروں میں بھی شری واری مندر قائم کرنے کا منصوبہ ہے، جہاں ہندو آبادی کی بڑی تعداد موجود ہے۔ انہوں نے بتایا کہ ماریشس، نیوزی لینڈ اور بھارت کے دیگر حصوں سے مندر کی تعمیر کے لیے درخواستیں موصول ہوئی ہیں۔

وزیر اعلیٰ نے کہا کہ تقریباً 2,300 سالہ شاندار تاریخ رکھنے والے تیروملا کو دنیا کے اہم مندروں میں ترقی دی جانی چاہیے۔ انہوں نے عقیدت مندوں کو مفت کھانا فراہم کرنے والے انّ دانم ٹرسٹ کے بارے میں بتایا کہ اس کے پاس 3,165 کروڑ روپے کا کارپس فنڈ ہے۔ انہوں نے انّ پرساد کی کوالٹی اور انتظامات کو مزید بہتر بنانے کی بات کہی۔

نائیڈو نے تروپتی ریلوے اسٹیشن سے بس اسٹینڈ تک اسکائی واک بنانے کے مجوزہ منصوبے کی بھی معلومات دی۔ اسے مرکزی حکومت کے تعاون سے مکمل کیا جائے گا۔ اس کے علاوہ حال ہی میں حاصل کی گئی 50 ایکڑ زمین پر کثیر المنزلہ پارکنگ سہولت تیار کرنے کی تجویز ہے۔

وزیر اعلیٰ نے بتایا کہ 3,200 ملازمین کو 230 کروڑ روپے کی لاگت سے رہائشی پلاٹ فراہم کیے جائیں گے۔ ساتھ ہی تروپتی کی اہم شاہراہوں کو آپس میں جوڑنے کے لیے بھی اقدامات کیے جائیں گے۔ انہوں نے حکام کو پورے مندر کے علاقے کو ’نیٹ زیرو‘ تصور کے مطابق ترقی دینے کی ہدایت دی۔ اس کے تحت شمسی، ہوا اور بیٹری توانائی کے استعمال پر زور دیا جائے گا۔ تمام عمارتوں پر سولر پینل لگانے کا منصوبہ ہے، تاکہ تقریباً 10 کروڑ یونٹ بجلی کی کھپت کو سبز توانائی سے پورا کیا جا سکے۔

وزیر اعلیٰ نائیڈو منگل کو تروپتی پہنچے تھے۔ انہوں نے تیروملا میں جاری شری واری برہموتسو میں اہل خانہ کے ہمراہ شرکت کی اور ریاستی حکومت کی جانب سے بھگوان وینکٹیشور کو ریشمی کپڑے پیش کیے۔

ہندوستھان سماچار

---------------

ہندوستان سماچار / عبدالواحد