ڈھاکہ، 8 اگست (ہ س)۔ نئی دہلی میں اگلے ماہ منعقد ہونے والے برکس سربراہ اجلاس میں بنگلہ دیش کے وزیر اعظم طارق رحمان کی شرکت طے مانی جارہی ہے۔ اس سلسلے میں آئندہ 10 اگست کو ڈھاکہ میں ہندوستانی ہائی کمشنر دنیش ترویدی اور وزیر اعظم طارق رحمان کے درمیان اہم ملاقات ہونے والی ہے۔ ڈھاکہ میں واقع ہندوستانی ہائی کمیشن سے وابستہ بااعتماد ذررائع نے بتایا کہ اس ملاقات میں حتمی فیصلہ ہونے کے بعد باضابطہ طور پر بنگلہ دیش کے وزیر اعظم کی برکس سربراہ اجلاس میں شرکت کا اعلان کیا جائے گا۔
اس دوران بنگلہ دیش کے وزیر اعظم طارق رحمان اور ہندوستان کے وزیر اعظم نریندر مودی کے درمیان ہونے والی ممکنہ ملاقات کا وقت بھی طے کیا جائے گا۔ اس کے علاوہ دونوں ممالک کے درمیان باہمی تعلقات کو مضبوط بنانے، اقتصادی تعاون سمیت دیگر اہم امور پر تبادلہ خیال کیا جائے گا۔ ہندوستان کے وزیر اعظم کے ساتھ بات چیت کے دوران بنگلہ دیش کی جانب سے کن کن امور کو اٹھایا جائے گا، اس پر 8 اگست کو وزیر اعظم کے دفتر میں ہونے والی ایک اہم میٹنگ میں فیصلہ کیا جائے گا۔
بمسٹیک کے صدر کی حیثیت سے ہندوستان کے وزیر اعظم نریندر مودی نے 12 اور 13 ستمبر کو نئی دہلی میں ہونے والے 18ویں برکس سربراہ اجلاس سے الگ ایک وسیع رابطہ
کاری اجلاس میں شرکت کے لیے بنگلہ دیش کے وزیر اعظم طارق رحمان کو مدعو کیا ہے۔
قابل ذکر ہے کہ 12 اور 13 ستمبر کو نئی دہلی میں برکس سربراہ اجلاس منعقد کیا جائے گا۔ بنگلہ دیش برکس کا رکن بننے میں دلچسپی رکھتا ہے۔ اس صورتحال میں اجلاس میں بنگلہ دیش کے وزیر اعظم کی شرکت دونوں ممالک کے درمیان اعلیٰ سطحی بات چیت کا موقع فراہم کرسکتی ہے۔
ہندوستھان سماچار
---------------
ہندوستان سماچار / انظر حسن
