دیوگیری بنگلے پر پارتھ پوار بھی موجود، ملاقات میں مبینہ طور پر سیاسی صورتحال اور آئندہ حکمت عملی پر تبادلہ خیالممبئی ، 6 اگست (ہ س) ۔ جن سوراج پارٹی کے بانی پرشانت کشور نے جمعرات کو ممبئی میں واقع دیوگیری بنگلے پر مہاراشٹر کی نائب وزیراعلیٰ سنیترا پوار اور نیشنلسٹ کانگریس پارٹی (اجیت پوار) کے رہنما پارتھ پوار سے ملاقات کی۔ اس ملاقات کے بعد ریاست کے سیاسی حلقوں میں مختلف قیاس آرائیاں شروع ہو گئی ہیں۔ اگرچہ ملاقات کے بارے میں دونوں جانب سے کوئی سرکاری بیان جاری نہیں کیا گیا، تاہم راشٹروادی کانگریس پارٹی کے ذرائع کے مطابق اس دوران مہاراشٹر کی موجودہ سیاسی صورتحال، آئندہ انتخابات کے ممکنہ سیاسی معاملات، تنظیمی حکمت عملی اور مختلف سیاسی امور پر تبادلہ خیال کیا گیا۔ ذرائع کا کہنا ہے کہ پارٹی کی تنظیمی توسیع اور مستقبل کے لائحہ عمل پر بھی غور کیا گیا۔قابلِ ذکر ہے کہ پرشانت کشور اس وقت اپنی جن سوراج پارٹی کی تنظیمی توسیع اور اسے قومی سطح پر ایک مضبوط سیاسی متبادل کے طور پر مستحکم کرنے کی مہم چلا رہے ہیں۔ انتخابی حکمت عملی تیار کرنے کے شعبے میں انہیں طویل تجربہ حاصل ہے اور وہ ملک کی متعدد اہم انتخابی مہمات سے وابستہ رہ چکے ہیں۔ پارتھ پوار، آنجہانی اجیت پوار کے فرزند ہیں اور مہاراشٹر کی سیاست میں سرگرم کردار ادا کر رہے ہیں، جبکہ سنیترا پوار راشٹروادی کانگریس پارٹی کی سینئر رہنما ہونے کے ساتھ ریاست کی نائب وزیراعلیٰ بھی ہیں۔ سیاسی مبصرین کے مطابق آئندہ انتخابات سے قبل مختلف سیاسی جماعتوں کے رہنماؤں کے درمیان اس نوعیت کی ملاقاتیں غیر معمولی اہمیت رکھتی ہیں، کیونکہ ان میں مستقبل کی سیاسی حکمت عملی، انتخابی امکانات اور باہمی رابطوں سے متعلق مختلف امور پر تبادلہ خیال کیا جاتا ہے۔

ہندوستھان سماچار

--------------------

ہندوستان سماچار / جاوید این اے