نئی دہلی، 06 اگست (ہ س)۔

بھارتیہ جنتا پارٹی (بی جے پی) کے پارلیمانی بورڈ کے رکن، راجیہ سبھا کے رکن پارلیمنٹ، بی جے پی او بی سی مورچہ کے قومی صدر اور راجیہ سبھا ہاؤس کمیٹی کے چیئرمین ڈاکٹر کے لکشمن نے جمعرات کو راجیہ سبھا میں وقفہ صفر (زیرو آور) کے دوران سنت سیوالال مہاراج کو قومی سطح پر اعزاز سے نوازنے کا اہم مطالبہ اٹھایا۔

ڈاکٹر لکشمن نے کہا کہ بنجارہ برادری کے قابلِ احترام سنت اور عظیم سماجی مصلح سنت سیوالال مہاراج نے اپنی پوری زندگی غریبوں، قبائلی برادریوں اور محروم طبقات کی فلاح و بہبود کے لیے وقف کر دی۔ انہوں نے سچائی، مساوات، سماجی ہم آہنگی، خود انحصاری اور فطرت کے احترام جیسے اعلیٰ انسانی اقدار کو فروغ دیا۔

انہوں نے کہا کہ سنت سیوالال مہاراج کی تعلیمات اور افکار آج بھی تلنگانہ، آندھرا پردیش، مہاراشٹر، کرناٹک، مدھیہ پردیش، چھتیس گڑھ، راجستھان سمیت ملک کی متعدد ریاستوں میں کروڑوں افراد کے لیے باعثِ تحریک ہیں۔

ڈاکٹر لکشمن نے مرکزی حکومت سے مطالبہ کیا کہ سنت سیوالال مہاراج کے اعزاز میں کئی اہم اقدامات کیے جائیں، جن میں ان کے یومِ پیدائش کو قومی تعطیل قرار دینا، ان کی تعلیمات کے فروغ کے لیے ملک بھر میں یادگاری اور بیداری پروگرام منعقد کرنا، نیز ان کی زندگی، فلسفہ اور سماجی خدمات پر تحقیق، اشاعت اور تعلیمی سرگرمیوں کی حوصلہ افزائی شامل ہے۔

انہوں نے سنت سیوالال مہاراج کے اعزاز میں یادگاری ڈاک ٹکٹ جاری کرنے کا بھی مطالبہ کیا۔

ڈاکٹر لکشمن نے کہا کہ سنت سیوالال مہاراج کو قومی سطح پر اعزاز دینا سماجی انصاف، قومی یکجہتی، خدمت اور سماجی ہم آہنگی کے ان کے عظیم نظریات کو حقیقی خراجِ عقیدت ہوگا۔ انہوں نے مرکزی حکومت سے اپیل کی کہ اس طویل عرصے سے زیرِ التوا مطالبے پر غور کرتے ہوئے جلد ضروری اقدامات کیے جائیں۔

ہندوستھان سماچار

ہندوستان سماچار / عطاءاللہ