شوساگر (آسام)، 5 اگست(ہ س)۔ مرکزی وزیر صحت اور بی جے پی کے سابق قومی صدر جے پی نڈا نے آج آسام کے شیوساگر ضلع میں سانتک اور نیپالی کھونٹی کے سیلاب سے متاثرہ علاقوں کا دورہ کیا۔ انہوں نے متاثرہ لوگوں سے ملاقات اور بات چیت کی۔

نڈا نے سیلاب سے متاثرہ خاندانوں سے ملاقات کے دوران گھروں، کھیتوں، مویشیوں اور عوامی بنیادی ڈھانچے کو بڑے پیمانے پر پہنچنے والے نقصان کے بارے میں ان کے خدشات سنے۔ انہوں نے متاثرہ دیہاتوں میں جاری امدادی اور بحالی کے کاموں کا بھی جائزہ لیا۔

بی جے پی کے سابق صدر نڈا نے ضروری امدادی سامان کی دستیابی اور بے گھر خاندانوں کو فراہم کی جانے والی امداد کے بارے میں دریافت کیا۔ انہوں نے رہائشیوں کو یقین دلایا کہ ان کے خدشات کا خیال رکھا گیا ہے اور حکومت تباہی سے متاثرہ افراد کی مدد کے لیے پوری طرح پرعزم ہے اور ہر ممکن مدد فراہم کی جائے گی۔

سنتک اور نیپالی کھونٹی شیوساگر کے سب سے زیادہ متاثرہ علاقوں میں شامل ہیں، جہاں حالیہ سیلاب نے بڑے پیمانے پر تباہی مچا ئی اور ہزاروں لوگوں کی زندگیوں اور معاش کو متاثر کیا۔ بہت سے خاندانوں نے اپنے گھروں اور سامان کو کھو دیا، جبکہ سیلاب کے پانی نے سڑکوں، باندھوں اور زرعی زمین کے بڑے حصے کو بھی نقصان پہنچایا۔

نڈا کا دورہ ایک ایسے وقت میں ہو رہا ہے جب آسام حکومت اور ضلعی انتظامیہ سیلاب سے متاثرہ علاقوں میں ہونے والے نقصان کا جائزہ لینے، فوری امداد فراہم کرنے اور بحالی کا کام شروع کرنے کے لیے تیزی سے کوششیں کر رہی ہیں۔ مرکزی وزیر کا دورہ بالائی آسام، خاص طور پر شیوساگر اور ملحقہ اضلاع میں سیلاب کی صورتحال کے بارے میں حکومت کے جاری جائزے کا حصہ ہے، جو تباہ کن سیلاب سے سب سے زیادہ متاثر ہوئے ہیں۔

شیوساگر کے بعد نڈا سیلاب سے ہونے والے نقصان کا جائزہ لینے کے لیے پڑوسی ناگالینڈ کے مون ضلع کے لیے روانہ ہو گئے۔ ناگالینڈ سے واپس آنے کے بعد وہ آج شام آسام کے چیرائیدیو ضلع کے سیلاب سے متاثرہ علاقے کا بھی دورہ کریں گے۔ جمعرات کو نڈا پڑوسی ریاست اروناچل پردیش کا دورہ کریں گے جہاں بادل پھٹنے سے شدید نقصان پہنچاہے۔ مرکزی وزیر نڈا منگل کو آسام، ناگالینڈ اور اروناچل پردیش کے تین روزہ دورے پر بالائی آسام کے ڈبرو گڑھ پہنچے تھے۔

مرکزی وزیر نڈا کے ساتھ وزیر اعلی ڈاکٹر ہمنتا بسوا شرما، وزیر اشوک سنگھل، وزیر کیشب مہنتا، وزیر پیوش ہزاریکا، وزیر سشانت بورگوہین، مقامی ایم ایل اے اور انتظامی حکام بھی موجودتھے۔

ہندوستھان سماچار

---------------

ہندوستان سماچار / عبدالسلام صدیقی