نئی دہلی، 5 اگست (ہ س)۔ مرکزی وزیر گری راج سنگھ نے جموں و کشمیر میں آرٹیکل 370 کی منسوخی کے سات برس مکمل ہونے کے موقع پر پی ڈی پی سربراہ اور جموں و کشمیر کی سابق وزیر اعلیٰ محبوبہ مفتی کے احتجاج پر سخت حملہ کیا۔ بدھ کو پارلیمنٹ میں صحافیوں سے بات کرتے ہوئے انہوں نے محبوبہ مفتی پر دہشت گردوں کی حمایت کا الزام لگایا اور انہیں دہشت گرد تک کہہ دیا۔

گری راج سنگھ نے کہا کہ محبوبہ مفتی طویل عرصے تک دہشت گردوں کے ساتھ کھڑی رہیں۔ انہوں نے کہا کہ ان کی پارٹی نے بھی ایک بار محبوبہ مفتی کے ساتھ حکومت چلائی اور انہیں صحیح راستے پر لانے کی کوششیں کی گئیں لیکن جب وہ نہیں بدلیں تو ان سے علیحدگی کا فیصلہ کیا گیا۔

مرکزی وزیر نے 5 اگست کو آرٹیکل 370 کی منسوخی کی ایک اہم تاریخ قرار دیتے ہوئے اسے ہندوستان کے لیے ایک تاریخی دن قرار دیا۔ انہوں نے کہا کہ جس طرح 15 اگست اور 26 جنوری ملک کے لیے اہم دن ہیں، اسی طرح 5 اگست بھی ایک اہم تاریخ ہے۔ ان کے مطابق اس فیصلے سے سردار ولبھ بھائی پٹیل کا خواب اور ملک کے کروڑوں لوگوں کی امنگیں پوری ہوئیں۔

گری راج سنگھ نے کہا کہ آرٹیکل 370 کی منسوخی کے بعد ملک میں ”ایک قوم، ایک جھنڈا، ایک وزیر اعظم اور ایک آئین کا نظام مضبوط ہوا ہے۔ درحقیقت، 5 اگست 2019 کو مرکزی حکومت نے جموں و کشمیر کو خصوصی درجہ دینے والے آئین کے آرٹیکل 370 کو منسوخ کرنے کا فیصلہ کیا تھا۔ اس کے ساتھ ہی، جموں و کشمیر تنظیم نو ایکٹ، 2019 کے تحت، اس وقت کی ریاست جموں و کشمیر کو دو مرکز کے زیر انتظام علاقوں: جموں و کشمیر اور لداخ میں تقسیم کیا گیا تھا۔

اس فیصلے کے بعد سے، بی جے پی اور مرکزی حکومت کی حامی تنظیمیں 5 اگست کو آرٹیکل 370 کی منسوخی کی سالگرہ کے طور پر مناتی رہی ہیں۔ دریں اثنا، جموں و کشمیر میں کئی علاقائی پارٹیاں اس فیصلے کے خلاف احتجاج کر تی رہی ہیں اور ریاست کی خصوصی حیثیت کی بحالی کا مطالبہ کر رہی ہیں۔ اسی تناظر میں پی ڈی پی کی سربراہ محبوبہ مفتی نے آرٹیکل 370 کی منسوخی کے دن احتجاج کیا۔

ہندوستھان سماچار

ہندوستان سماچار / محمد شہزاد