علی گڑھ, 30 اگست (ہ س): اترپردیش بلڈنگ اینڈ دیگر تعمیراتی مزدور بہبود بورڈ کی جانب سے تعمیراتی شعبے سے وابستہ مزدوروں اور ان کے خاندانوں کی سماجی و معاشی بہتری کے لیے مختلف فلاحی اسکیمیں چلائی جا رہی ہیں۔ چیف ڈیولپمنٹ آفیسر یوگیندر کمار نے اہل مزدوروں سے اپیل کی ہے کہ وہ اپنا رجسٹریشن اور تجدید کراکر ان اسکیموں کا فائدہ اٹھائیں۔
انہوں نے بتایا کہ 18 سے 60 سال کی عمر کے ایسے تعمیراتی مزدور جنہوں نے گزشتہ 12 ماہ میں کم از کم 90 دن تعمیراتی کام کیا ہو، بورڈ میں رجسٹریشن کراسکتے ہیں۔ رجسٹریشن کے لیے آدھار کارڈ، بینک پاس بک اور آدھار سے منسلک موبائل نمبر کے ساتھ یو پی بی او سی ڈبلیو ڈاٹ ان ویب سائٹ یا قریبی جن سیوا مرکز سے رجوع کیا جاسکتا ہے۔
رجسٹرڈ مزدوروں کو کنیا شادی امدادی اسکیم کے تحت 65 ہزار روپے، بین ذات شادی پر 75 ہزار اور اجتماعی شادی میں 85 ہزار روپے تک مالی مدد دی جاتی ہے۔ زچگی، بچوں اور بچیوں کی مدد کے لیے بھی مالی امداد کا انتظام ہے۔
ڈپٹی لیبر کمشنر محمد ندیم نے بتایا کہ سنت روی داس تعلیمی حوصلہ افزائی اسکیم کے تحت مزدوروں کے بچوں کو پہلی جماعت سے پوسٹ گریجویشن تک 2 ہزار سے 24 ہزار روپے تک تعلیمی امداد دی جاتی ہے۔ اٹل رہائشی اسکول اسکیم کے تحت 6 سے 14 سال کے اہل بچوں کو مفت رہائشی تعلیم، کھانا اور لباس فراہم کیا جاتا ہے۔ حادثے یا موت کی صورت میں مالی امداد، جبکہ 60 سال کی عمر مکمل کرنے والے اور کم از کم 10 سال سے رجسٹرڈ اہل مزدوروں کو ماہانہ ایک ہزار روپے پنشن دی جاتی ہے۔ سنگین بیماری کی صورت میں علاج کے اخراجات کی مکمل ادائیگی کا بھی انتظام ہے۔
محکمہ کے مطابق 2017 سے 2026 تک ضلع میں 1,54,579 تعمیراتی مزدوروں کا آن لائن رجسٹریشن کیا گیا اور مختلف اسکیموں کے تحت 9,264 مزدوروں کو تقریباً 33.40 کروڑ روپے کا فائدہ پہنچایا گیا۔ کنیا شادی امدادی اسکیم سے 3,697 خاندان، زچگی و بچوں کی مدد اسکیم سے 2,951 خاندان اور سنت روی داس تعلیمی اسکیم سے 2,053 خاندان مستفید ہوچکے ہیں۔ پردھان منتری شرم یوگی مان دھن یوجنا میں 7,748 مزدور خاندان شامل کیے گئے ہیں، جبکہ ای-شرم کے تحت 14,62,074 مزدوروں کا رجسٹریشن کیا جاچکا ہے۔
محکمہ نے تعمیراتی کام سے وابستہ مزدوروں سے اپیل کی ہے کہ وہ بروقت رجسٹریشن کراکر فلاحی اسکیموں کا فائدہ حاصل کریں اور اپنے خاندان کو سماجی و معاشی تحفظ فراہم کریں۔
ہندوستھان سماچار
---------------
ہندوستان سماچار / سید کامران علی گڑھ
