اے ایم یو کے اسکولوں میں کھیلوں کا قومی دن جوش و خروش سے منایا گیا

علی گڑھ، 29 اگست (ہ س)۔ علی گڑھ مسلم یونیورسٹی کے مختلف اسکولوں میں عظیم ہاکی کھلاڑی میجر دھیان چند کے یوم پیدائش کے موقع پر کھیلوں کا قومی دن جوش و خروش سے منایا گیا۔ اے ایم یو اے بی کے ہائی اسکول بوائز و گرلز، ایس ٹی ایس اسکول، اے ایم یو گرلز اسکول، اے ایم یو سٹی گرلز ہائی اسکول اور عبداللہ اسکول میں مختلف کھیلوں اور جسمانی سرگرمیوں کا اہتمام کیا گیا۔

اے ایم یو اے بی کے ہائی اسکول بوائز میں منعقدہ تقریب میں سابق وائس چانسلر پروفیسر محمد گلریز مہمانِ خصوصی، جبکہ ڈائریکٹر اسکول ایجوکیشن پروفیسر قدسیہ تحسین اور اسسٹنٹ ڈائریکٹر ڈاکٹر صالحہ جمال مہمانانِ اعزازی تھیں۔ قائم مقام پرنسپل افروز علی، کوآرڈینیٹر رئیس احمد اور اسپورٹس ٹیچر عمران خان بھی موجود رہے۔ پروفیسر محمد گلریز نے کھیلوں کو طلبہ کی ہمہ جہت ترقی، ٹیم ورک، قیادت اور نظم و ضبط کے لیے اہم قرار دیا۔ مختلف مقابلوں کے بعد طلبہ میں انعامات تقسیم کیے گئے۔

اے ایم یو اے بی کے ہائی اسکول گرلز میں خصوصی اسمبلی کے بعد ہاکی، رسہ کشی اور شٹل ریس منعقد ہوئی۔ سینئر ہاکی میں گرین ٹیم اور رسہ کشی میں بلیو ہاؤس نے کامیابی حاصل کی، جبکہ پرائمری ریلے ریس میں بھی بلیو ہاؤس اول رہا۔ شمشاد نثار اعظمی، ذیشان نواب اور ڈاکٹر فرحت پروین نے پروگرام میں اہم کردار ادا کیا۔ کوثر شہاب، روشن افروز، نجم الرحمٰن فریدی اور سید ایس ایم عمر نے بھی تعاون کیا۔

ایس ٹی ایس اسکول میں محمد عدنان خان نے میجر دھیان چند کی زندگی اور کامیابیوں پر روشنی ڈالی، جبکہ پرنسپل فیصل نفیس نے طلبہ کو روزانہ کھیلوں میں حصہ لینے کی ترغیب دی۔ لیمن اینڈ اسپون، بک بیلنس، شٹل ریس، والی بال، باسکٹ بال، فٹ بال اور رسہ کشی کے مقابلے ہوئے۔ ڈاکٹر محمد عالمگیر، ڈاکٹر نسیم احمد، سید اکرام حیدر جعفری، ثمینہ یوسف خان، فرحان حبیب، محمد عاصم، وسیم خان اور غزالہ تنویر نے انتظامات میں تعاون کیا۔

اے ایم یو گرلز اسکول میں یوگا، تائیکوانڈو، والی بال اور باسکٹ بال کے مقابلے ہوئے۔ پروگرام پرنسپل آمنہ ملک اور وائس پرنسپل الکا اگروال کی رہنمائی میں منعقد ہوا، جبکہ محمد وسیم احمد اور شالنی چوہان نے اسے مربوط کیا۔

اے ایم یو سٹی گرلز ہائی اسکول میں مختلف جماعتوں کے لیے لیمن ریس، ٹو لیگ ریس، سلو سائیکلنگ، رسہ کشی اور کرکٹ کے مقابلے ہوئے۔ عالیہ عارف، لبیبہ کامران، نابیہ، انابیہ، شیزرا، تحریم آصف، ماہرہ، آصفہ، عائزہ، جیویکا پاٹھک، کہکشاں اور غوثیہ نے نمایاں کارکردگی کا مظاہرہ کیا۔ پروگرام نازش صدیقی، محسن اور عنبرین رحمان کی نگرانی میں ہوا۔ پرنسپل محمد جاوید اختر اور وائس پرنسپل پاکیزہ خان نے طلبہ کی حوصلہ افزائی کی اور ٹرافیاں و تمغے تقسیم کیے۔

عبداللہ اسکول میں جماعت دوم تا پنجم کے طلبہ نے دوڑ، بک بیلنس ریس، کھو کھو اور رسہ کشی میں حصہ لیا۔ اسپورٹس ٹیچر عظیم حمید نے پروگرام کو مربوط کیا، جبکہ سپرنٹنڈنٹ عمرہ ظہیر نے کھیلوں کی اہمیت پر روشنی ڈالی۔

ہندوستھان سماچار

---------------

ہندوستان سماچار / سید کامران علی گڑھ