مالیگاوں، 26 اگست (ہ س)۔مالیگاوں میونسپل کارپوریشن کے ڈپٹی میئر کے دفتر میں ٹیپو سلطان کی تصویر دوبارہ لگائے جانے کے خلاف بھارتیہ جنتا پارٹی کے منماد ضلع یونٹ کی جانب سے ایڈیشنل سپرنٹنڈنٹ آف پولیس کو احتجاجی عرضداشت پیش کی گئی۔ بی جے پی کے وفد نے مطالبہ کیا کہ متعلقہ تصویر فوری طور پر ہٹائی جائے۔ میونسپل کارپوریشن کے ڈپٹی میئر کے دفتر میں اس سے قبل بھی ٹیپو سلطان کی تصویر لگائے جانے پر تنازع پیدا ہوا تھا۔ اس وقت بی جے پی اور مختلف ہندو تنظیموں کی شدید مخالفت کے بعد تصویر ہٹا دی گئی تھی۔ اس وقت ڈپٹی میئر کی جانب سے وضاحت کی گئی تھی کہ دفتر میں تعمیراتی کام جاری ہونے کی وجہ سے تصویر ہٹائی گئی ہے۔تاہم دفتر کا کام مکمل ہونے کے بعد ٹیپو سلطان کی تصویر دوبارہ لگائے جانے سے معاملہ ایک بار پھر تنازع کا موضوع بن گیا ہے۔ اسی پس منظر میں بی جے پی کے وفد نے ایڈیشنل سپرنٹنڈنٹ آف پولیس سے ملاقات کرکے احتجاجی عرضداشت پیش کی۔بی جے پی کے ضلع صدر نیلیش کچوے نے کہا کہ چھترپتی شیواجی مہاراج کی سرزمین مہاراشٹر میں ٹیپو سلطان کی تعریف اور تشہیر برداشت نہیں کی جائے گی۔عرضداشت میں بی جے پی کی جانب سے الزام عائد کیا گیا کہ مہاپرشوں کی سرکاری فہرست میں ٹیپو سلطان کا نام شامل نہ ہونے کے باوجود منماد شہر میں سماجی امن اور نظم و ضبط کو خراب کرنے اور سیاسی مفادات حاصل کرنے کے مقصد سے متنازع اقدامات کیے جا رہے ہیں۔ عرضداشت میں کہا گیا کہ ٹیپو سلطان کی تصویر دوبارہ لگانا بھی اسی سلسلے کا حصہ ہے۔بی جے پی نے خبردار کیا کہ اس معاملے کے باعث مستقبل میں اگر سماجی کشیدگی یا امن و امان کا مسئلہ پیدا ہوتا ہے تو اس کی مکمل ذمہ داری ڈپٹی میئر پر عائد ہوگی۔ بی جے پی نے یہ بھی کہا کہ اگر متعلقہ تصویر فوری طور پر نہیں ہٹائی گئی تو بی جے پی اور منماد شہر کی ہندو تنظیموں کی جانب سے شدید احتجاج کیا جائے گا۔اس موقع پر ضلع صدر نیلیش کچوے، دادا جادھو، شہر صدر دیوا پاٹل، جنرل سیکریٹری کملیش نکم، لکی گل، نندو تاتیا سویاگاؤںکر، سندیپ بھسے، ایڈووکیٹ چندر شیکھر شیوالے، ایڈووکیٹ ہرشل پوار، دھننجے پوار، آپا کُلتے، پرتیکشا بھوسلے، منگلا تلوارے، مالتی گوانڈے، نانا مراٹھے سمیت دیگر افراد موجود تھے۔ہندوستھان سماچار

--------------------

ہندوستان سماچار / جاوید این اے