کانپور، 22 اگست (ہ س)۔ فرم بند کرانے کا یقین دلا کر اس کی جی ایس ٹی رجسٹریشن کا غلط استعمال کرتے ہوئے 2.20 کروڑ روپے سے زائد کی مبینہ دھوکہ دہی کے معاملے میں ریل بازار پولیس نے سال 2024 سے مطلوب سی اے محمد عرفان کو لکھنو سے گرفتار کر لیا ہے۔ اس پر 10 ہزار روپے کا انعام کا اعلان تھا۔
ڈپٹی کمشنر آف پولیس (ایسٹ) ستیہ جیت گپتا نے ہفتہ کو بتایا کہ محمد عرفان سال 2024 سے مقدمے میں مطلوب تھا۔ وہ گرفتاری سے بچنے کے لیے مسلسل اپنے ٹھکانے بدل رہا تھا۔ پولیس اور سرویلانس ٹیم اس کی تلاش میں مصروف تھیں۔ اطلاع کی بنیاد پر 21 اگست کو اسے لکھنو کے گڈمبا تھانہ علاقے میں واقع افسان اپارٹمنٹ سے گرفتار کیا گیا۔
معاملے میں سجات گنج ساکن محمد سلیمان نے شکایت درج کرائی تھی کہ انہوں نے 18 جولائی کو ریڈی میڈ کپڑوں کی تیاری سے متعلق ایک فرم شروع کی تھی۔ کاروبار خسارے میں جانے کے بعد انہوں نے فرم بند کرنے کی ذمہ داری اپنے سی اے محمد عرفان کو سونپی تھی۔ اس کے بعد وہ 12 نومبر 2019 کو سعودی عرب چلے گئے۔ سی اے نے انہیں فرم بند ہو جانے کی اطلاع دی تھی۔
اپریل 2024 میں جی ایس ٹی محکمے کا نوٹس ملنے پر سلیمان کو فرم کے بند نہ ہونے کا علم ہوا۔ جی ایس ٹی محکمے سے معلوم ہوا کہ مالی سال 20-2019 اور 21-2020 میں فرم کے جی ایس ٹی نمبر کا غلط استعمال کر کے کل 2,20,75,800 روپے کی مبینہ فرضی بلنگ کی گئی۔
شکایت کے مطابق، مختلف فرموں کے نام پر ریڈی میڈ کپڑوں کے بجائے لیدر فنشنگ سمیت دیگر کاموں کے فرضی بل تیار کیے گئے۔ ان کی کوئی ادائیگی سلیمان کی فرم یا بینک اکاونٹ میں نہیں ہوئی۔ معاملے میں ریل بازار تھانے میں مقدمہ درج کیا گیا تھا۔ پولیس کے مطابق، 27 فروری 2026 کو ملزم پر 10 ہزار روپے کے انعام کا اعلان کیا گیا تھا۔ گرفتاری کے بعد اسے عدالت میں پیش کیا جا رہا ہے۔
ہندوستھان سماچار
---------------
ہندوستان سماچار / انظر حسن
