نئی دہلی، 31 جولائی (ہ س)۔ دہلی پولیس کی کرائم برانچ (این آر -2) یونٹ نے بوانا میں بدنام زمانہ جوگندر عرف کالا قتلمعاملے کا انکشاف کرتے ہوئے ہمانشو عرف بھاو¿ -وکی عرف ہڈل گینگ کے دو شارپ شوٹرز کو انکاو¿نٹر کے بعد گرفتار کر لیا۔ ملزمین نے پولیس ٹیم پر فائرنگ بھی کی تاہم گولی اے ایس آئی پروین دہیا کی بلٹ پروف جیکٹ کو لگی جس سے ان کی جان بچ گئی۔ پولیس کا دعویٰ ہے کہ بروقت کارروائی کرتے ہوئے روہنی میں ایک اور ٹارگٹ کلنگ کو بھی ناکام بنا دیا گیا۔

گرفتار ملزمان کی شناخت بوانا کے رہنے والے 19 سالہ ہرش واسنے اور سلطان پور ڈباس کے رہنے والے 20 سالہ وپن عرف شیام سندر کے طور پر کی گئی ہے۔ دونوں 18 جولائی کو پوٹھ خورد میں جوگندر عرف کالا کے دن دہاڑے قتل کے سلسلے میں مطلوب تھے۔ پوسٹ مارٹم میں چھ گولیوں کے زخموں کی تصدیق ہوئی، اور جائے وقوعہ سے چھ خول برآمد ہوئے۔

ایک سینئر پولیس افسر نے جمعہ کو بتایا کہ کرائم برانچ کو اطلاع ملی تھی کہ دو ملزمین روہنی میں ایک چوری شدہ اسکوٹی پر غیر قانونی ہتھیاروں کے ساتھ دو لوگوں کو مارنے جا رہے ہیں۔ اس کے بعد روہنی کے سیکٹر 29 کے قریب جال بچھا دیا گیا۔ رات تقریباً 11 بجے جب پولیس نے اسکوٹی کو روکنے کی کوشش کی تو ان کے پیچھے بیٹھے ہرش نے اے ایس آئی پروین دہیا پر گولی چلا دی۔ جوابی کارروائی میں پولیس نے اسکوٹی کے ٹائر کو نشانہ بنایا لیکن گولی ٹیل لائٹ پر لگی جس سے اسکوٹی پھسل گئی ۔ اس کے بعد دونوں کو گرفتار کر لیا گیا۔

ملزمان سے دو نیم خودکار پستول، چھ زندہ کارتوس، دو خالی خول اور ہری نگر سے چوری کی گئی ایک اسکوٹی برآمد کی گئی۔ ہرش کے ساتھ ملنے والی ایک ڈائری میں پون اگروال اور سریندر گپتا کے نام دھمکی آمیز پیغامات تھے۔ پوچھ گچھ کے دوران، ملزمان نے انکشاف کیا کہ انہوں نے گینگ لیڈر ہمانشو عرف بھاو¿ اور وکی عرف ہڈل کے کہنے پر دونوں افراد کو قتل کرنے اور علاقے میں دہشت پھیلانے کے لیے جائے وقوعہ پر ایک دھمکی آمیز نوٹ چھوڑنے کا منصوبہ بنایا تھا۔

پوچھ گچھ کے دوران دونوں نے بتایا کہ وہ سوشل میڈیا کے ذریعے گینگ کے ساتھ رابطے میں آئے تھے۔ ان کے مالی بحران کا فائدہ اٹھاتے ہوئے انہیں بھاری رقم کا لالچ دیا گیا۔ قتل سے پہلے وہ دودھ بیچنے کے بہانے کئی روز تک ٹارگٹ فیملی کی ریکی کرتے رہے۔ واقعہ کے بعد وہ اتر پردیش، بہار، مدھیہ پردیش اور راجستھان میں اپنے ٹھکانے بدلتے رہے۔ کرائم برانچ نے دونوں کے خلاف آرمس ایکٹ اور تعزیرات ہند کی مختلف دفعات کے تحت مقدمہ درج کر لیا ہے اور گینگ کے دیگر ارکان، اسلحہ سپلائی نیٹ ورک اور مفرور لیڈروں کی تلاش تیز کر دی ہے۔ پولیس کا کہنا ہے کہ اس کارروائی سے گینگ کے نیٹ ورک کو بڑا دھچکا لگا ہے۔

ہندوستھان سماچار

ہندوستان سماچار / محمد شہزاد