جموں, 31 جولائی (ہ س)۔ جموں و کشمیر کے انسدادِ بدعنوانی بیورو (اے سی بی) نے محکمہ فائر اینڈ ایمرجنسی سروسز میں سال 2020 کی بھرتی کے سلسلے میں جاری تحقیقات کے تحت منتخب امیدواروں کو 3 اگست کو قد کی پیمائش کے لیے طلب کیا ہے۔اے سی بی سنٹرل، سدھرا جموں کے سینئر سپرنٹنڈنٹ آف پولیس کی جانب سے 30 جولائی کو جاری کیے گئے مکتوب کے مطابق یہ کارروائی پولیس اسٹیشن اے سی بی سنٹرل، جموں میں درج ایف آئی آر نمبر 01/2025 کی تفتیش کا حصہ ہے۔مکتوب میں ڈائریکٹر جنرل فائر اینڈ ایمرجنسی سروسز کو ہدایت دی گئی ہے کہ آرڈر نمبر 823 مؤرخہ 4 اکتوبر 2020 کے تحت منتخب ہونے والے اور مختلف اضلاع میں تعینات امیدواروں کو مطلع کیا جائے کہ وہ 3 اگست کو صبح 10 بجے اپنے متعلقہ مراکز پر حاضر ہوں۔
شیڈول کے مطابق جموں، کٹھوعہ اور سانبہ کے 82 امیدوار ڈی پی ایل جموں، راجوری اور پونچھ کے 38 امیدوار ڈی پی ایل راجوری، ادھم پور اور ریاسی کے 29 امیدوار ڈی پی ایل ادھم پور، جبکہ ڈوڈہ، کشتواڑ اور رام بن کے امیدوار ڈی پی ایل ڈوڈہ میں پیش ہوں گے۔ اسی طرح سری نگر، بڈگام اور گاندربل کے 130 امیدوار پی سی آر/ڈی پی ایل سری نگر، بارہمولہ، بانڈی پورہ اور کپواڑہ کے 124 امیدوار ڈی پی ایل بارہمولہ، جبکہ اننت ناگ، شوپیان، پلوامہ اور کولگام کے 93 امیدوار ڈی پی ایل اننت ناگ میں قد کی پیمائش کے لیے حاضر ہوں گے۔
اے سی بی نے متعلقہ مراسلے کے ساتھ ضلع وار منتخب امیدواروں کی فہرست بھی جاری کی ہے۔ بیورو کے مطابق قد کی پیمائش کا عمل سال 2020 کی فائر اینڈ ایمرجنسی سروسز بھرتی سے متعلق جاری تحقیقات کا اہم حصہ ہے۔
ہندوستھان سماچار
---------------
ہندوستان سماچار / محمد اصغر
