نئی دہلی، 29 جولائی (ہ س)۔

انڈین ریلوے نے کہا ہے کہ حفاظتی اقدامات، جدید ٹیکنالوجی، بہتر انفراسٹرکچر، اور جدید نگرانی کے نظام نے ریل حادثات میں نمایاں کمی کی ہے۔ سال 2026-27 میں جون تک صرف دو سنگین ٹرین حادثات ریکارڈ کیے گئے، جبکہ 2014-15 میں یہ تعداد 135 تھی۔ اسی عرصے کے دوران ایکسیڈنٹ انڈیکس بھی کم ہو کر 0.01 ہو گیا ہے۔ ریلوے نے دہلی-ممبئی اور دہلی-ہاوڑا جیسے مصروف ریل روٹس پر 2,569 روٹ کلومیٹر پر دیسی خودکار ٹرین پروٹیکشن سسٹم، کوچ 4.0 کو کامیابی سے لاگو کیا ہے۔

ریلوے وزیر اشونی ویشنو نے بدھ کو لوک سبھا میں ایک سوال کے تحریری جواب میں کہا کہ ریل حادثات کی تعداد 2025-26 میں گھٹ کر 16 رہ گئی ہے، جو کہ 2014-15 کے مقابلے میں 88 فیصد کم ہے۔ رواں مالی سال 2026-27 میں جون تک صرف دو ایسے حادثات ہوئے ہیں۔ ایکسیڈنٹ انڈیکس بھی 2014-15 میں 0.11 سے گھٹ کر 2025-26 میں 0.01 پر آ گیا ہے، جو کہ 91 فیصد کمی ہے۔

انہوں نے کہا کہ ریلوے میں حفاظتی اخراجات میں مسلسل اضافہ کیا گیا ہے۔ یہ 2013-14 میں 39,200 کروڑ روپے تھا، جو 2026-27 کے بجٹ میں بڑھ کر 1.20 لاکھ کروڑ روپے سے زیادہ ہو گیا ہے۔ ریلوے نے 6,671 اسٹیشنوں پر الیکٹرانک انٹر لاکنگ اور فل ٹریک سرکٹنگ، 10,395 لیول کراسنگ پر انٹر لاکنگ، جدید ریل پٹریوں، لمبی ریل پینلز، الٹراسونک فلو ڈٹیکشن، ٹریک ریکارڈنگ سسٹم اور دیگر ٹیکنالوجیز کے ذریعے حفاظت کو مضبوط کیا ہے۔

ریلوے کے وزیر نے کہا کہ براڈ گیج نیٹ ورک پر تمام بغیر پائلٹ لیول کراسنگ کو جنوری 2019 تک ختم کر دیا گیا ہے۔ اس کے علاوہ ایل ایچ بی کوچز کی تیاری، ریلوے پلوں کا باقاعدہ معائنہ، فائر سیفٹی سسٹم، جدید سگنلنگ، ٹریک مشینوں کا استعمال اور عملے کی باقاعدہ تربیت جیسے اقدامات نے بھی حفاظتی اقدامات میں اہم کردار ادا کیا ہے۔

انہوں نے وضاحت کی کہ کوچ ایک ہندوستانی ترقی یافتہ خودکار ٹرین پروٹیکشن سسٹم ہے جو کہ اگر لوکو پائلٹ مقررہ رفتار کی حد پر عمل نہیں کرتا ہے تو خود بخود بریک لگا کر حادثات کے خطرے کو کم کرتا ہے۔ جولائی 2024 میں منظور شدہ کوچ ورژن4.0میں بہتر لوکیشن کی درستگی ،بڑے یارڈوں میں سگنل کی زیادہ درست معلومات اور الیکٹرانک انٹر لاکنگ سسٹم کے ساتھ براہ راست انضمام جیسی خصوصیات شامل کی گئی ہیں۔

ویشنو نے بتایا کہ اس سال 20 جولائی تککوچ 4.0 ملک کے مصروف ترین ریل روٹس، دہلی-ممبئی اور دہلی-ہاو¿ڑہ پر کل 2,569 روٹ کلومیٹر پر کامیابی سے کام کر چکا ہے۔ 21,858 روٹ کلومیٹر پر ٹریک سائیڈ آرمرنگ بھی جاری ہے۔ اب تک، 11,253 کلومیٹر طویل آپٹیکل فائبر کیبل بچھائی جا چکی ہے، 1,668 ٹیلی کمیونیکیشن ٹاورز نصب کیے جا چکے ہیں، 988 اسٹیشن ڈیٹا سینٹرز تیار کیے گئے ہیں، اور 6,153 لوکوموٹیوز کو آرمر سسٹم کے ساتھ لگایا گیا ہے۔ اس کے علاوہ، 7,327 لوکوموٹیوز اور 1,200ای ایم یو/ایم ای ایم یو ریک پر آرمرنگ کا کام جاری ہے۔

انہوں نے کہا کہ 94,000 سے زیادہ تکنیکی ماہرین، انجینئرز، اور آپریشنل عملے کو کوچ سسٹم پر تربیت دی گئی ہے، جن میں تقریباً 57000 لوکو پائلٹس اور اسسٹنٹ لوکو پائلٹس شامل ہیں۔ اس سال جون تک، کوچ پروجیکٹ پر 3,874 کروڑ روپے خرچ کیے جا چکے ہیں، جب کہ 2026-27 کے لیے 2,066 کروڑ مختص کیے گئے ہیں۔ ریلوے کا کہنا ہے کہ کوچ پروجیکٹ کو ملک بھر میں تیز ی سے توسیع کی جا رہی ہے ۔

ہندوستھان سماچار

ہندوستان سماچار / عطاءاللہ