نئی دہلی، 29 جولائی (ہ س)۔ وزیر اعظم نریندر مودی نے آج شیروں کے عالمی دن کے موقع پر قوم اور جنگلی حیات سے محبت کرنے والوں کو مبارکباد دیتے ہوئے شیروں کے تحفظ کے لیے ہندوستان کے عزم کا اعادہ کیا ۔ انہوں نے کہا کہ ہندوستان کو فخر ہے کہ دنیا کے تقریبا 70 فیصد شیر ہمارے ملک میں رہتے ہیں۔

وزیر اعظم مودی نے ایکس پر کہا کہ ہندوستان میں شیروں کے تحفظ کی کوششیں فطرت کے ساتھ ہم آہنگی سے رہنے کی ہماری صدیوں پرانی ثقافت اور عوامی تعاون کے جذبے سے متاثر ہیں۔ ملک سائنس پر مبنی تحفظ، کمیونٹی کی شمولیت اور پائیدار ترقی کے ذریعے شیروں کے تحفظ کو مزید مضبوط بنانے کے لیے مسلسل کام کر رہا ہے۔

انہوں نے شیروں کے تحفظ میں نمایاں کردار ادا کرنے والے جنگلاتی اہلکاروں، سائنسدانوں اور تحفکارکنوں کی لگن کی تعریف کی ۔ انہوں نے کہا کہ ان کی انتھک کوششوں کے ذریعے ہندوستان نے اس شعبے میں قابل ذکر کامیابیاں حاصل کی ہیں۔ وزیر اعظم نے کہا کہ مرکزی حکومت مقامی برادریوں کو بااختیار بنانے اور انسانی اور جنگلی حیات کے تصادمات کو کم کرنے کے لیے بھی پرعزم ہے۔ وزیر اعظم نے اعتماد کا اظہار کیا کہ اجتماعی کوششوں سے ہندوستان حیاتیاتی تنوع کے تحفظ کے شعبے میں نئی بلندیوں کو عبور کرتا رہے گا۔

ہندوستھان سماچار

---------------

ہندوستان سماچار / عبدالسلام صدیقی