علی گڑھ, 29 جولائی (ہ س): ماحولیاتی پائیداری کو فروغ دینے کے مشترکہ اقدام کے تحت، علی گڑھ مسلم یونیورسٹی (اے ایم یو) کی نیشنل سروس اسکیم (این ایس ایس) نے نہرو یوا کیندر، علی گڑھ کے تعاون سے اپنے کیمپس میں شجرکاری مہم کا اہتمام کیا۔
نہرو یووا کیندر، علی گڑھ کی ضلعی یوتھ آفیسر ڈاکٹر سونالی نیگی نے این ایس ایس کے رضاکاروں اور عملے کے اراکین کی موجودگی میں این ایس ایس کیمپس میں امرود کا ایک پودا لگایا۔ یہ پروگرام این ایس ایس کوآرڈینیٹر ڈاکٹر محمد محسن خان کی رہنمائی میں منعقد کیا گیا۔
حاضرین سے خطاب کرتے ہوئے ڈاکٹر نیگی نے ماحولیاتی توازن برقرار رکھنے میں شجرکاری کی اہمیت پر زور دیا اور نوجوانوں سے اپیل کی کہ وہ ماحولیات کے تحفظ میں فعال کردار ادا کریں۔
ڈاکٹر محمد محسن خان نے نہرو یووا کیندر کی جانب سے فراہم کیے گئے تعاون کو سراہتے ہوئے کہا کہ اس نوعیت کے مشترکہ اقدامات نوجوانوں میں ماحولیاتی شعور کو مضبوط بنانے میں معاون ثابت ہوتے ہیں۔ پروگرام کا اختتام این ایس ایس رضاکاروں کی جانب سے فطرت کے تحفظ اور اس تقریب کے دوران لگائے گئے پودے کی دیکھ بھال کے عہد کے ساتھ ہوا۔
ہندوستھان سماچار
---------------
ہندوستان سماچار / سید کامران علی گڑھ
29 Jul 2026
