علی گڑھ، 29 جولائی (ہ س)۔ جواہر لعل نہرو میڈیکل کالج (جے این ایم سی)، علی گڑھ مسلم یونیورسٹی (اے ایم یو) کے ایم بی بی ایس، سال اوّل بیچ-2025 کی ٹیم نے کنگ جارج میڈیکل یونیورسٹی (کے جی ایم یو)، لکھنؤ میں منعقدہ آل انڈیا فزیالوجی کوئز مقابلہ 2026 میں پہلی پوزیشن حاصل کی۔

اے ایم یو کی ٹیم میں محمد عبیر اکرم اور محمد ارحم خان شامل تھے، جنہوں نے ملک بھر کے مختلف طبی اداروں کی ٹیموں کو شکست دے کر یونیورسٹی کا نام روشن کیا۔

اس کامیابی پر شعبہ فزیالوجی کے چیئرمین پروفیسر محمد اسلم نے طلبہ کو اسناد اور یادگاری نشان پیش کرکے ان کی حوصلہ افزائی کی۔ فاتحین کو مبارکباد دیتے ہوئے انہوں نے کہا کہ طلبہ کی غیر معمولی کارکردگی ان کی محنت، تعلیمی امتیاز اور شعبہ کی جانب سے باصلاحیت طلبہ کی سرپرستی کے عزم کی عکاس ہے۔

اس کامیابی نے پوری یونیورسٹی کا وقار بلند کیا ہے۔ اس موقع پر ڈاکٹر ایس اعجاز عباس رضوی، ڈاکٹر انور حسن صدیقی اور ڈاکٹر احمد فراز بھی موجود تھے۔ انہوں نے طلبہ کو اس نمایاں کامیابی پر مبارکباد پیش کی ۔

ہندوستھان سماچار

---------------

ہندوستان سماچار / سید کامران علی گڑھ