بھونیشور، 29 جولائی (ہ س)۔ اڈیشہ کے وزیر اعلی موہن چرن ماجھی نے کہا ہے کہ ریاست میں جاری شدید بارش اور سیلاب جیسی صورتحال کے درمیان ہر شہری کی زندگی اور حفاظت ان کی حکومت کی اولین ترجیح ہے۔سوشل میڈیا پلیٹ فارم 'ایکس' پر اپنے پیغام میں وزیر اعلی نے بتایا کہ وہ خود ہر لمحہ سیلاب کی صورتحال کی نگرانی کر رہے ہیں۔ انہوں نے کہا کہ انہوں نے موجودہ صورتحال اور امدادی کارروائیوں کے حوالے سے چیف سکریٹری اور اسپیشل ریلیف کمشنر سے تفصیلی بات چیت کی۔ اس کے علاوہ متاثرہ علاقوں میں لوگوں کی حفاظت کو یقینی بنانے کے لیے پوری انتظامیہ کو ہدایات دی گئی ہیں۔لوگوں سے اپیل کرتے ہوئے وزیر اعلی نے کہا، گھبرائیں نہیں اور خوفزدہ نہ ہوں۔ ہم ہر قدم پر آپ کے ساتھ ہیں۔ انتظامیہ کی ہدایات پر عمل کریں اور محفوظ رہیں۔ سیلاب سے متاثرہ اضلاع میں انتظام کو مزید مستحکم کرنے کے لیے ریاستی حکومت نے تین سینئر آئی اے ایس افسران کو بالاسور، بھدرک اور جاج پور اضلاع میں خصوصی ذمہ داری کے ساتھ تعینات کیا ہے۔ یہ افسران موقع پر راحت، بچاو¿ اور بحالی کی کارروائیوں کی نگرانی کریں گے۔وزیر اعلی نے خصوصی ریلیف کمشنر کے دفتر اور ریاستی ایمرجنسی آپریشن سنٹر کو پانی کی سطح اور صورتحال کی مسلسل نگرانی کے لیے 24×7 فعال رہنے کی ہدایت کی ہے۔اس کے علاوہ این ڈی آر ایف، او ڈی آر اے ایف، فائر سروس اور پولیس دستوں کو ہائی الرٹ کر دیا گیا ہے۔ یہ ٹیمیں نشیبی علاقوں میں رہنے والے لوگوں کو محفوظ مقامات پر منتقل کرنے کے لیے پوری طرح تیار ہیں۔حکومت نے اس بات کو بھی یقینی بنایا ہے کہ تمام سیلف شیلٹرز میں ضروری سہولیات موجود ہوں۔ ان میں پینے کا صاف پانی، پکا ہوا کھانا، ہنگامی صحت کی خدمات، اینٹی وینم انجیکشن اور مویشیوں کے لیے مناسب چارہ شامل ہیں۔پولیس کو ہدایت کی گئی ہے کہ وہ متاثرہ دیہاتوں میں رات کی گشت میں اضافہ کرے تاکہ پناہ گاہوں تک پہنچنے والوں کی املاک کی حفاظت کی جا سکے۔وزیر اعلی نے حکام کو ہدایت کی ہے کہ وہ ان لوگوں کو فوری معاوضہ فراہم کریں جن کے گھروں اور زرعی زمینوں کو سیلاب سے نقصان پہنچا ہے۔قابل ذکر ہے کہ شمالی اور مغربی اڈیشہ کے کئی حصے مسلسل بارش کی وجہ سے سیلاب جیسی صورتحال کا شکار ہیں۔ بیترنی اور سالندی سمیت کئی دریا خطرے کے نشان سے اوپر بہہ رہے ہیں، جس کی وجہ سے انتظامیہ کو راحت اور بچاو¿ کی کارروائیاں تیز کرنی پڑ رہی ہیں۔

ہندوستھان سماچار

---------------

ہندوستان سماچار / عبدالسلام صدیقی