پٹنہ، 29 جولائی (ہ س)۔ بہار میں اساتذہ بننے کی تیاری کر رہے لاکھوں امیدواروں کے لیے بڑی خوشخبری ہے۔ ریاستی حکومت نے ٹیچر ریکروٹمنٹ امتحان (ٹی آر ای ۔4) کے عمل کو آگے بڑھایا ہے اور 32,388 اساتذہ کی تقرری کے لیے محکمہ تعلیم کی درخواست بہار پبلک سروس کمیشن (بی پی ایس سی) کو بھیج دی ہے۔ اس سے اساتذہ بھرتی کے عمل کے چوتھے مرحلے کے شروع ہونے کا راستہ صاف ہو گیا ہے۔وزیر اعلیٰ سمراٹ چودھری نے بدھ کے روز سوشل میڈیا پلیٹ فارم ایکس پر یہ معلومات شیئر کرتے ہوئے اسے بہار کے نوجوانوں کے لیے ایک اور تاریخی تحفہ قرار دیا۔ انہوں نے کہا کہ ریاستی حکومت معیاری تعلیم، نوجوانوں کے روزگار اور ترقی یافتہ بہار کے عزم کو پورا کرنے کے لیے مسلسل کام کر رہی ہے۔ ان کے مطابق اس بھرتی مہم سے نہ صرف اسکولوں میں اساتذہ کی کمی کو پورا کیا جا سکے گا بلکہ ہزاروں نوجوانوں کو سرکاری ملازمت کے مواقع بھی فراہم ہوں گے۔

وزیر اعلیٰ نے بتایا کہ محکمہ تعلیم نےٹی آر ای ۔4 کے لیے کل 32,388 آسامیوں کے لیے بی پی ایس سی کو درخواست بھیجی ہے۔ کمیشن اب بھرتی کے عمل کو آگے بڑھائے گا۔ امید ہے کہ بی پی ایس سی جلد ہی ایک تفصیلی بھرتی کا اشتہار جاری کرے گا، جس کے بعد آن لائن درخواست کا عمل شروع ہو جائے گا۔حکومت کی طرف سے جاری کردہ معلومات کے مطابقٹی آر ای ۔4 کے تحت مختلف سطحوں پر اساتذہ کی تقرری کی جائے گی۔ اس میں پہلی سے پانچویں جماعت کے لیے 3,847، 6ویں سے 8ویں جماعت کے لیے 8,563، 9ویں سے 10ویں جماعت کے لیے 3,877 اور 11ویں سے 12ویں جماعت کے لیے 16,101 آسامیاں شامل ہیں۔ اس طرح کل 32,388 خالی آسامیوں کو پر کیا جائے گا۔

محکمہ تعلیم کی جانب سے ریکوزیشن بھیجنے کے بعد امیدوار اب بی پی ایس سی کے سرکاری اشتہار کا بے صبری سے انتظار کر رہے ہیں۔ کمیشن کی جانب سے اشتہار جاری کرنے کے بعد آن لائن درخواست کی تاریخ، اہلیت، مضامین کے لحاظ سے آسامیاں، تحفظات، امتحانات کا شیڈول، انتخاب کا عمل، امتحان فیس اور دیگر ضروری رہنما خطوط سے متعلق تفصیلی معلومات کو عام کیا جائے گا۔قابل ذکر ہے کہ بہار میں اساتذہ کی بھرتی کے گذشتہ تین مرحلوں کے ذریعے بڑی تعداد میں امیدواروں کی تقرری کی جا چکی ہے۔ نتیجتاًٹی آر ای۔4 ریکوزیشن کے جاری ہونے سے لاکھوں امیدواروں کی امیدوں طویل عرصے سے بھرتی کا انتظار کر رہے تھے ۔

ہندوستھان سماچار

ہندوستان سماچار / Mohammad Afzal Hassan