گلاسگو، 27 جولائی (ہ س):۔

بھارتی ایتھلیٹ تیجس شرسے نے دولتِ مشترکہ کھیل 2026 میں مردوں کی 110 میٹر رکاوٹ دوڑ کے فائنل کے لیے کوالیفائی کر لیا ہے، جبکہ بھارت کے تیز رفتار رنر گرندر ویر سنگھ 100 میٹر مقابلے کی ابتدائی ہیٹ سے آگے نہ بڑھ سکے، جس کے باعث تمغہ جیتنے کی ان کی امیدیں ختم ہو گئیں۔

تیجس شرسے نے پہلی ہیٹ میں 13.76 سیکنڈ کا وقت نکالتے ہوئے تیسری پوزیشن حاصل کی۔ فائنل میں رسائی کے لیے اپنی ہیٹ میں ابتدائی تین کھلاڑیوں میں شامل ہونا یا دونوں ہیٹس کے مجموعی نتائج میں ٹاپ آٹھ میں جگہ بنانا ضروری تھا۔ خراب آغاز کے باوجود تیجس نے شاندار واپسی کرتے ہوئے تیسری پوزیشن حاصل کی اور فائنل میں جگہ بنا لی۔

اس ہیٹ میں انگلینڈ کے سیموئل بینیٹ نے 13.20 سیکنڈ کے ساتھ پہلا، جبکہ جمیکا کے جیروم کیمپبل نے 13.33 سیکنڈ کے ساتھ دوسری پوزیشن حاصل کی۔

دوسری جانب، بھارت کے ابھرتے ہوئے اسپرنٹر گرندر ویر سنگھ سے 100 میٹر دوڑ میں تمغے کی بڑی امید تھی، لیکن وہ ابتدائی ہیٹ ہی میں باہر ہو گئے۔ انہوں نے 10.39 سیکنڈ کا وقت ریکارڈ کیا، جو سیمی فائنل میں پہنچنے کے لیے کافی ثابت نہ ہوا۔ تمام 11 ہیٹس کے بعد وہ 73 ایتھلیٹس میں مجموعی طور پر 28ویں نمبر پر رہے، جبکہ سیمی فائنل میں رسائی کے لیے تقریباً 10.24 سیکنڈ کا وقت درکار تھا۔

دولتِ مشترکہ کھیلوں سے قبل گرندر ویر نے مئی میں رانچی میں منعقدہ فیڈریشن کپ میں 10.09 سیکنڈ کا وقت نکال کر نیا قومی ریکارڈ قائم کیا تھا اور 10.10 سیکنڈ سے کم وقت میں 100 میٹر مکمل کرنے والے پہلے بھارتی مرد ایتھلیٹ بنے تھے۔ تاہم، دولتِ مشترکہ کھیلوں میں اپنے پہلے ہی مقابلے میں وہ اس کارکردگی کو دہرا نہ سکے۔

ادھر، بھارت کے مرلی سری شنکر نے بھی مردوں کی لانگ جمپ کے فائنل کے لیے کوالیفائی کر لیا ہے۔ برمنگھم 2022 کے چاندی کے تمغہ یافتہ سری شنکر نے اپنی پہلی ہی کوشش میں 8.01 میٹر کی چھلانگ لگا کر براہِ راست فائنل میں جگہ بنا لی۔ براہِ راست کوالیفائی کرنے کے لیے 8.00 میٹر یا اس سے زیادہ کی چھلانگ لگانا یا ٹاپ 12 میں شامل ہونا ضروری تھا۔ اب ان کی نظریں برمنگھم کے چاندی کے تمغے کو اس بار سونے کے تمغے میں تبدیل کرنے پر مرکوز ہیں۔

ہندوستھان سماچار

ہندوستان سماچار / عطاءاللہ