کولکاتا، 25 جولائی (ہ س)۔

دھرمتلہ میں جمعہ کے روز طلباء کے احتجاج کے دوران ہوئے تشدد اور میڈیا اہلکاروں پر حملے کے سلسلے میں، وزیر اعلی شبھیندو ادھیکاری نے ہفتہ کو اسمبلی میں چار بدنام زمانہ مجرموں کے ناموں کا انکشاف کرتے ہوئے کہا کہ یہ افراد طلباء نہیں تھے بلکہ منظم فسادی تھے۔ انہوں نے واضح کیا کہ حال ہی میں منظور کیے گئے پبلک سیفٹی ایکٹ کے تحت تمام ملزمان کے خلاف سخت کارروائی کی جائے گی۔

وزیر اعلیٰ نے اسمبلی میں کہا کہ اس معاملے میں اب تک 70 لوگوں کی شناخت ہو چکی ہے۔ ان میں راجابغان کے افروز، خیدیر پور کے ناہید، اقبال پور کے تنویر اور واٹ گنج کے راہل جمال شامل ہیں۔ انہوں نے الزام لگایا کہ یہ لوگ طلباء نہیں تھے بلکہ تشدد پھیلانے کی نیت سے احتجاج میں شامل ہوئے تھے۔

انہوں نے کہا کہ دھرمتلہ تشدد اور صحافیوں پر حملے کے سلسلے میں سات ایف آئی آر درج کی گئی ہیں اور تمام معاملات میں پبلک سیفٹی ایکٹ کی دفعات لگائی گئی ہیں۔ وزیراعلیٰ نے کہا کہ حکومت کسی شرپسند کو نہیں بخشے گی۔

شبھیند ادھیکاری نے کہا، اینٹی گینگسٹر ایکٹ ایسے عناصر کے خلاف موثر کارروائی کو یقینی بنانے کے لیے نافذ کیا گیا ہے۔ ہم ایسی کارروائی کریں گے کہ صرف ایک نہیں، بلکہ ان کی تین نسلیں اسے یاد رکھیں گی۔اب ریاست کے لوگ بھی دیکھیں گے کہ یہ قانون کتنا ضروری تھا۔

وزیر اعلیٰ نے یہ بھی کہا کہ پولیس کو پہلے ہی واضح ہدایات دی گئی تھیں کہ جب تک صورتحال مکمل طور پر قابو سے باہر نہ ہو جائے طاقت کا استعمال نہ کریں۔ انہوں نے ڈیوٹی پر موجود پولیس اہلکاروں کے تحمل کو سراہتے ہوئے کہا کہ اشتعال انگیزی کے باوجود پولیس نے صبر و تحمل کا مظاہرہ کیا اور امن و امان برقرار رکھا۔

ہندوستھان سماچار

ہندوستان سماچار / عطاءاللہ