گوہاٹی، 25 جولائی (ہ س)۔ دیکھو ندی اور سملوگوڑی علاقے میں آئے بڑے پیمانے پر سیلاب کی وجہ سے شمال مشرقی سرحدی ریلوے (این ایف آر) پر ریل خدمات بری طرح متاثر ہوئی ہیں۔ ریل کی پٹریوں اور آس پاس کے علاقوں میں پانی بھر جانے کی وجہ سے سملوگوڑی-نامتیالی اور سملوگوڑی-سلنگھاٹ سیکشن پر ٹرین آپریشن اگلے اطلاع تک معطل کر دیا گیا ہے۔

این ایف آر کے سی پی آر او نے آج بتایا کہ مسافروں کی حفاظت کو مدنظر رکھتے ہوئے، ڈبروگڑھ اور تنسوکیا سے شروع ہونے والی کئی لمبی دوری کی ٹرینوں کو رنگیا-رنگاپاڑہ-ڈبرو گڑھ روٹ کے ذریعے موڑ دیا گیا ہے۔ متعدد مقامی مسافر، انٹرسٹی اور ڈیمو ٹرینوں کو منسوخ کر دیا گیا ہے، جبکہ ناگالینڈ ایکسپریس سمیت کچھ ٹرینوں کو جزوی طور پر ختم کیا جائے گا اور جزوی طور پر ماریانی سے شروع کیا جائے گا۔

ریلوے کے سینئر حکام کی نگرانی میں انجینئرنگ ٹیمیں جنگی بنیادوں پر راحت اور بحالی کے کاموں میں مصروف ہیں اور 24 گھنٹے نگرانی کی جا رہی ہے تاکہ معمول کے مطابق ریل آپریشن جلد از جلد بحال ہو سکے۔

پھنسے ہوئے مسافروں کی سہولت کے لیے لمڈنگ-مریانی، تنسوکیا-بھوجو اور نیو تنسوکیا-مورنہاٹ کے درمیان خصوصی ٹرین خدمات کو بھی اضافی دوروں کے ساتھ بڑھا دیا گیا ہے۔ریلوے انتظامیہ نے مسافروں سے اپیل کی ہے کہ وہ سفر شروع کرنے سے پہلے اپنی ٹرین کی تازہ ترین صورتحال کے بارے میں معلومات حاصل کریں۔

ہندوستھان سماچار

ہندوستان سماچار / محمد شہزاد