ممبئی ، 25 جولائی (ہ س): مہاراشٹر کے ناسک اور پالگھر اضلاع میں ہفتہ کو زلزلے کے ہلکے جھٹکے محسوس کیے گئے، جس کے بعد دونوں اضلاع میں خوف و ہراس پھیل گیا۔ تاہم ابتدائی اطلاعات کے مطابق کسی جانی یا مالی نقصان کی کوئی اطلاع نہیں ملی۔ ضلع انتظامیہ نے عوام سے اپیل کی ہے کہ وہ افواہوں پر کان نہ دھریں، احتیاط برتیں اور صرف سرکاری اطلاعات پر اعتماد کریں۔

ناسک ضلع انتظامیہ کے مطابق ضلع کی سرگانا تحصیل کے بورگاؤں اور ملحقہ علاقوں میں ہفتہ کی صبح 9 بج کر 55 منٹ پر یکے بعد دیگرے زلزلے کے چار ہلکے جھٹکے محسوس کیے گئے۔ ریکٹر اسکیل پر زلزلے کی شدت 3.6 ریکارڈ کی گئی۔

مسلسل چار جھٹکوں کے بعد بورگاؤں اور اطراف کے علاقوں کے مکین احتیاطاً گھروں سے باہر نکل آئے۔ انتظامیہ کے مطابق ابتدائی جانچ میں زلزلے کی شدت معمولی پائی گئی اور کسی قسم کے جانی یا مالی نقصان کی اطلاع موصول نہیں ہوئی۔ تاہم اچانک آنے والے جھٹکوں کے باعث علاقے میں خوف کا ماحول پیدا ہوگیا، جبکہ انتظامیہ صورتحال پر مسلسل نظر رکھے ہوئے ہے۔ نیشنل سینٹر فار سیزمولوجی کے مطابق زلزلے کا مرکز ناسک شہر سے تقریباً 44 کلومیٹر شمال مغرب میں واقع تھا۔

دوسری جانب پالگھر ضلع میں بھی ہفتہ کی صبح تقریباً 10 بج کر 57 منٹ پر زلزلے کا ایک ہلکا جھٹکا محسوس کیا گیا۔ ریکٹر اسکیل پر اس کی شدت 3.1 ریکارڈ کی گئی۔ زلزلے کا مرکز پالگھر کے دہانو تعلقہ کے دھندلواڑی کاسا علاقے میں تھا، جس کے باعث مقامی لوگوں میں خوف و ہراس پھیل گیا۔ نیشنل سینٹر فار سیزمولوجی کے مطابق پالگھر میں آنے والے زلزلے کا مرکز ممبئی سے تقریباً 93 کلومیٹر شمال میں زمین کی سطح سے تقریباً 9 کلومیٹر گہرائی میں واقع تھا۔

زلزلے کے جھٹکے محسوس ہوتے ہی متعدد افراد احتیاطاً گھروں سے باہر نکل آئے۔ اگرچہ کسی قسم کے نقصان کی اطلاع نہیں ملی، تاہم علاقے میں کچھ دیر تک خوف کی فضا برقرار رہی۔ پالگھر ضلع انتظامیہ نے بتایا کہ اس کی ٹیمیں متاثرہ علاقوں کا معائنہ کر رہی ہیں اور صورتحال پر مسلسل نظر رکھی جا رہی ہے۔ انتظامیہ نے شہریوں سے اپیل کی ہے کہ وہ غیر مصدقہ اطلاعات یا افواہوں پر یقین نہ کریں، پرسکون رہیں اور کسی بھی ہنگامی صورتحال میں سرکاری ہدایات پر عمل کریں۔

ہندوستھان سماچار

--------------------

ہندوستان سماچار / جاوید این اے