ڈہانو سیلاب متاثرین کی مدد کے لیے تھانے میونسپل کارپوریشن کی خصوصی ریلیف ٹیم روانہممبئی، 25 جولائی (ہ س)۔ شدید بارش کے باعث پالگھر ضلع کے ڈہانو علاقے میں پیدا ہونے والی سیلابی صورتحال کے پیش نظر تھانے میونسپل کارپوریشن نے امدادی اور صفائی مہم کا آغاز کرتے ہوئے سیلاب متاثرین کی مدد کے لیے خصوصی ریلیف ٹیم روانہ کی ہے۔ آشاڑھی ایکادشی کے موقع پر خدمت ہی وٹھل کی حقیقی بھکتی ہے کے پیغام کے تحت سالڈ ویسٹ مینجمنٹ محکمہ نے میونسپل کمشنر سوربھ راؤ کی رہنمائی میں یہ اقدام کیا ہے۔میونسپل کارپوریشن کے مطابق ڈہانو میں سیلاب سے پیدا ہونے والی مشکلات سے نمٹنے کے لیے سالڈ ویسٹ مینجمنٹ محکمہ کے 200 ملازمین، 10 سینی ٹیشن انسپکٹروں اور 5 ڈپٹی چیف سینی ٹیشن انسپکٹروں پر مشتمل خصوصی ٹیم کو ضروری آلات، صفائی کے سازوسامان اور دیگر امدادی وسائل کے ساتھ پانچ بسوں کے ذریعے ڈہانو روانہ کیا گیا ہے۔ صفائی مہم کو مؤثر بنانے کے لیے 10 جیٹنگ مشینیں بھی ڈہانو بھیجی گئی ہیں۔ تھانے میونسپل کارپوریشن اور ڈہانو میونسپل کونسل مشترکہ طور پر سوچھتا واری مہم کے تحت بڑے پیمانے پر صفائی مہم چلائیں گے تاکہ سیلاب کے بعد علاقے کو جلد از جلد معمول پر لایا جا سکے۔محکمہ نے بتایا کہ پانی اترنے کے بعد خصوصی ٹیم علاقے سے کچرا اٹھانے، گاد اور کیچڑ صاف کرنے، جراثیم کش ادویات کا چھڑکاؤ کرنے اور عوامی صحت کے تحفظ کے لیے ضروری اقدامات کرے گی تاکہ سیلاب کے بعد بیماریوں کے پھیلاؤ کو روکا جا سکے۔ تھانے میونسپل کارپوریشن نے کہا کہ آشاڑھی ایکادشی کے موقع پر صرف مذہبی عقیدت کا اظہار ہی کافی نہیں بلکہ عوام کی خدمت بھی حقیقی عبادت ہے۔ اسی جذبے کے تحت کارپوریشن نے اپنی سماجی ذمہ داری ادا کرتے ہوئے سیلاب متاثرین کی مدد کے لیے یہ خصوصی ریلیف مہم شروع کی ہے۔سالڈ ویسٹ مینجمنٹ محکمہ نے اپنے بیان میں کہا کہ قدرتی آفات کے دوران محکمہ ہمیشہ متاثرہ شہریوں کے ساتھ کھڑا رہا ہے اور ریاستی حکومت، ضلعی انتظامیہ اور مقامی اداروں کے تعاون سے امداد، صفائی اور بازآبادکاری کے کاموں میں فعال کردار ادا کرتا رہا ہے۔ محکمہ نے یقین دلایا کہ ڈہانو کے متاثرہ علاقوں میں معمول کی زندگی جلد بحال کرنے کے لیے تمام ممکنہ اقدامات کیے جائیں گے۔ہندوستھان سماچار-------------------

ہندوستان سماچار / جاوید این اے