طلبہ کے حقوق اور شفاف بھرتی نظام کے لیے آزاد سماج پارٹی کا احتجاج، صدرِ جمہوریہ کے نام یادداشت پیش

علی گڑھ، 25 جولائی (ہ س)۔ علی گڑھ میں آزاد سماج پارٹی (کانشی رام) نے نوجوانوں کے مفادات، تعلیمی نظام میں اصلاحات، شفاف بھرتی عمل اور حالیہ طلبہ تحریکوں کے دوران پیش آئے واقعات کی غیرجانبدارانہ جانچ کے مطالبے کو لے کر ضلع مجسٹریٹ کے توسط سے صدرِ جمہوریہ کے نام ایک عرضداشت پیش کی۔ عرضداشت میں مطالبہ کیا گیا کہ نیٹ-یوجی، جے ای ای مین سمیت تمام مسابقتی امتحانات کے لیے شفاف، محفوظ اور قابلِ اعتماد امتحانی نظام نافذ کیا جائے، پیپر لیک کے ذمہ دار افراد کے خلاف سخت قانونی کارروائی اور کڑی سزا کو یقینی بنایا جائے۔ اس کے علاوہ بھرتی امتحانات کی فیس ختم کرنے، مقررہ وقت میں تقرریاں مکمل کرنے، سالانہ بھرتی کیلنڈر جاری کرنے اور پورے تقرری عمل کو مکمل طور پر شفاف بنانے کا بھی مطالبہ کیا گیا۔

پارٹی نے حالیہ طلبہ احتجاج کے دوران پولیس کارروائی کی غیرجانبدارانہ تحقیقات کرانے، قصوروار اہلکاروں کے خلاف سخت کارروائی کرنے اور آئندہ پولیس و سکیورٹی اہلکاروں کی وردی پر واضح نام پلیٹ لازمی قرار دینے کا مطالبہ بھی کیا۔ عرضداشت میں پیپر لیگ معاملہ کے سبب جان گنوانے والے طلبہ کے اہل خانہ کو ایک ایک کروڑ روپے کی مالی امداد، طلبہ کے خلاف درج تمام مقدمات واپس لینے اور ملک کے تعلیمی نظام میں جامع اصلاحات نافذ کرنے کا بھی مطالبہ کیا گیا۔

اس موقع پر اجتماع سے خطاب کرتے ہوئے اتر پردیش حکومت کے سابق وزیر اور آزاد سماج پارٹی کی کور کمیٹی کے رکن چودھری مہندر سنگھ نے کہا کہ نوجوان ملک کا مستقبل ہیں، لیکن آج وہ پیپر لیک، بے روزگاری اور غیر شفاف بھرتی نظام سے شدید مایوسی کا شکار ہیں۔ انہوں نے کہا کہ آزاد سماج پارٹی نوجوانوں کے حقوق کے تحفظ کے لیے ہر سطح پر جدوجہد جاری رکھے گی اور جب تک تعلیم اور روزگار کے نظام میں شفافیت قائم نہیں ہوتی، پارٹی اپنی آواز بلند کرتی رہے گی۔ انہوں نے حکومت سے مطالبہ کیا کہ طلبہ کے مسائل کو سنجیدگی سے حل کیا جائے اور انہیں انصاف فراہم کیا جائے۔اس موقع پر آزاد سماج پارٹی کے تنظیمی عہدیداران، کارکنان اور بھیم آرمی کے متعدد اراکین بھی موجود رہے۔

ہندوستھان سماچار

---------------

ہندوستان سماچار / سید کامران علی گڑھ