جموں، 25 جولائی (ہ س)۔

جموں و کشمیر میں خراب موسم کے باعث چھ روز تک معطل رہنے کے بعد سالانہ امرناتھ یاترا ہفتہ کے روز دوبارہ بحال ہوگئی۔ ہفتہ کی صبح 6,269 تیرتھ یاتریوں پر مشتمل 18واں جتھہ بھگوتی نگر یاتری نیواس سے بالتل بیس کیمپ کے لیے سخت حفاظتی انتظامات کے درمیان روانہ ہوا۔ حکام کے مطابق جتھے میں 1,470 خواتین، 25 بچے اور 54 سادھو شامل تھے، جنہیں 223 گاڑیوں کے ذریعے رات تقریباً 2 بج کر 40 منٹ پر روانہ کیا گیا۔ تاہم پہلگام راستے کے لیے کوئی قافلہ روانہ نہیں کیا گیا۔

یاد رہے کہ مسلسل بارش اور خراب موسمی حالات کے پیش نظر 19 جولائی کو امرناتھ یاترا کو احتیاطی طور پر معطل کر دیا گیا تھا۔ ادھم پور-رام بن سیکٹر میں لینڈ سلائیڈنگ اور پتھر گرنے کے باعث جموں-سری نگر قومی شاہراہ بھی تین روز تک بند رہی، جس کے بعد شاہراہ کو دوبارہ آمدورفت کے قابل بنایا گیا۔ حکام کے مطابق اب تک تقریباً چار لاکھ تیرتھ یاتری مقدس گپھا میں حاضری دے چکے ہیں، جبکہ تقریباً ایک لاکھ 20 ہزار یاتریوں نے جموں کے بھگوتی نگر بیس کیمپ سے اپنا سفر شروع کیا ہے۔

امرناتھ یاترا 28 اگست کو رکشا بندھن کے موقع پر اختتام پذیر ہوگی۔

ہندوستھان سماچار

ہندوستان سماچار / محمد اصغر