کولکاتا، 24 جولائی (ہ س)۔

مغربی بنگال کے وزیر اعلی شبھیندو ادھیکاری نے وزیر اعظم نریندر مودی کے فاسٹ ٹریک عدالتیں قائم کرنے کے اعلان کا خیرمقدم کیا ہے تاکہ نیٹ سمیت مختلف مسابقتی امتحانات میں پیپر لیک ہونے کے ذمہ داروں کے لیے فوری اور سخت سزا کو یقینی بنایا جا سکے۔ انہوں نے کہا کہ نوجوانوں کے مستقبل کو خطرے میں ڈالنے والوں کو کسی بھی قیمت پر بخشا نہیں جائے گا اور ایسے جرائم کے خلاف حکومت کی زیرو ٹالرنس کی پالیسی جاری رہے گی۔

جمعرات کی رات سوشل میڈیا پلیٹ فارم ایکس پر وزیر اعظم نریندر مودی کی پوسٹ شیئر کرتے ہوئے، شبھیندو ادھیکاری نے لکھا کہ وزیر اعظم کا یہ فیصلہ پیپر لیک مافیا کو کچلنے کی سمت میں ایک فیصلہ کن قدم ثابت ہوگا۔ انہوں نے کہا کہ اس سے قصور واروں کو فوری اور سخت سزا دی جائے گی اور ملک کے لاکھوں ہونہار طلباء کی محنت اور مستقبل کا تحفظ ہو گا۔

اس سے قبل وزیر اعظم نریندر مودی نے بھی اپنے سوشل میڈیا پیغام میں کہا تھا کہ ملک کے نوجوانوں کا مستقبل اور فلاح و بہبود اولین ترجیح ہے۔ انہوں نے اعلان کیا کہ پیپر لیک جیسے مقدمات کی سماعت کے لیے فاسٹ ٹریک عدالتیں قائم کی جائیں گی، قصور واروںکو فوری اور سخت سزا دی جائے گی۔

اس معاملے پر نامہ نگاروں سے بات کرتے ہوئے شبھیندو ادھیکاری نے کہا، وزیر اعظم کا آج دیا گیا پورا بیان ہم سب کے دل کی بات ہے۔ کسی بھی ریاست کے وزیر اعلیٰ کو الگ سے کچھ کہنے کی ضرورت نہیں ہے۔ یہ پورے ملک کا مسئلہ ہے۔ وزیر اعظم نے جو کہا وہ ہمارا پیغام بھی ہے۔

ہندوستھان سماچار

ہندوستان سماچار / عطاءاللہ