گلاسگو، 24 جولائی (ہ س)۔

اسکاٹ لینڈ کے شہر گلاسگو میں واقع ہائیڈرو ایرینا میں جمعرات کی شب رنگ، روشنی، موسیقی اور ثقافتی ورثے کے دلکش امتزاج کے ساتھ کامن ویلتھ گیمز 2026 کی شاندار افتتاحی تقریب منعقد ہوئی۔ روایتی اسکاٹش ثقافت اور جدید ٹیکنالوجی کے حسین امتزاج نے تقریب کو یادگار بنا دیا۔ ہزاروں شائقین سے کھچا کھچ بھرے اسٹیڈیم میں فنکاروں کی دل موہ لینے والی پرفارمنس، مسحور کن بصری مناظر اور کھلاڑیوں کی شاندار پریڈ نے کھیلوں کے اس عظیم میلے کا بہترین آغاز کیا۔

تقریب کا آغاز اسکاٹ لینڈ کی عظیم ثقافتی روایت کو اجاگر کرنے سے ہوا۔ ملک کے عظیم ترین کھلاڑیوں میں شمار ہونے والے قدآور ٹریک سائیکلسٹ’ سر‘ کرس ہوئے اور معروف اداکار گریگ میک ہیو مشہور برطانوی سائنس فکشن سیریز ڈاکٹر ہو کے معروف ٹارڈِس باکس کے ذریعے اسٹیج پر نمودار ہوئے۔ اس موقع پر شاہ چارلس اور رانی کیملا کی موجودگی نے تقریب کی شان میں مزید اضافہ کیا۔ ٹارڈِس کو اس مرتبہ اسکاٹ لینڈ کی تاریخ، ثقافت اور ورثے کو دنیا کے سامنے پیش کرنے کی علامت کے طور پر استعمال کیا گیا۔

اس کے بعد موسیقی، رقص اور جدید ٹیکنالوجی کا ایسا دلکش امتزاج پیش کیا گیا جس نے پورے ایرینا کو مسحور کر دیا۔ اسکاٹش الیکٹرانک فوک موسیقاروں والٹوس کی دھنوں پر تیار کردہ خصوصی ساؤنڈ ٹریک کے ساتھ دولتِ مشترکہ کی 74 گیمز ایسوسی ایشنز کے کھلاڑی ایک ایک کرکے میدان میں داخل ہوئے۔ ایل ای ڈی اسکرینوں پر ہر دستے کا تعارف کرایا گیا، جبکہ اسکاٹ لینڈ کی قدرتی نباتات سے متاثر رنگا رنگ اینی میشنز کے ذریعے کامن ویلتھ بیٹن کو نہایت خوبصورتی سے پیش کیا گیا۔

میزبان اسکاٹ لینڈ کا دستہ سب سے آخر میں میدان میں اترا، جہاں گھریلو شائقین نے زوردار نعروں اور تالیوں سے اس کا استقبال کیا۔ کھلاڑیوں کی پریڈ تقریب کا سب سے جذباتی اور دلکش لمحہ ثابت ہوئی، جس میں کھیل کی روح، اتحاد اور دولتِ مشترکہ خاندان کے تنوع کی بھرپور جھلک نظر آئی۔

افتتاحی تقریب میں اسکاٹ لینڈ کی لوک داستانوں اور تاریخی ورثے کو بھی جدید انداز میں پیش کیا گیا۔ مشہور لوخ نیس مونسٹر کی کہانی سے لے کر گلاسگو کی علامت سمجھی جانے والی ’وائس آف ٹائم‘ گھڑی تک، ہر پیشکش نے حاضرین کو اسکاٹ لینڈ کی ثقافتی تاریخ سے روشناس کرایا۔ گلوکار نیتھن ایونز کی پُرجوش پرفارمنس، گلاسگو سینٹرل اسٹیشن پر مبنی رنگا رنگ رقص، اور شہر کی جہاز سازی، ٹیکسٹائل صنعت، ریلوے انجن اور بھاپ کے انجنوں کی تاریخی وراثت کو بھی نہایت شاندار انداز میں پیش کیا گیا۔

معروف گلوکار کیلم بیٹی نے مقبول گیت ’یس سر، آئی کین بوگی‘ پیش کرکے حاضرین کو جھومنے پر مجبور کر دیا، جبکہ گلوکارہ نینا نیسبٹ نے 1988 کے معروف اسکاٹش گیت ’آئی ایم گونا بی (500 مائلز) کو اپنی پُرسوز آواز میں پیش کرکے پورے ماحول کو جذباتی بنا دیا۔تقریب کے دوران کامن ویلتھ اسپورٹ کے صدر ڈونلڈ رکارے اور گلاسگو 2026 کے چیئرمین جارج بلیک نے اپنے خطاب میں کہا کہ کامن ویلتھ گیمز صرف کھلاڑیوں کے نہیں بلکہ پوری دنیا کے عوام کے کھیل ہیں، جن کا مقصد کھیلوں کے ذریعے مختلف ممالک اور ثقافتوں کو ایک مضبوط رشتے میں جوڑنا ہے۔

آخر میں شاہ چارلس نے باضابطہ طور پر کامن ویلتھ گیمز 2026 کے افتتاح کا اعلان کیا۔ اس کے ساتھ ہی 23 جولائی سے 2 اگست تک جاری رہنے والے اس کثیر کھیلوں کے عالمی ایونٹ کا باقاعدہ آغاز ہوگیا، جس میں دولتِ مشترکہ کے مختلف ممالک کے ہزاروں کھلاڑی تمغوں کے حصول کے لیے اپنی صلاحیتوں کا مظاہرہ کریں گے۔

ہندوستھان سماچار

ہندوستان سماچار / Mohammad Khan