بھوپال کو بین الاقوامی روئنگ ہب بنانے کی سمت میں اہم پیش رفت

بھوپال، 24 جولائی (ہ س)۔

مدھیہ پردیش کو بین الاقوامی کھیلوں کے انعقاد کا اہم مرکز بنانے کی سمت میں ایک اور اہم قدم بڑھا ہے۔ روئنگ فیڈریشن آف انڈیا (آر ایف آئی) کے سکریٹری جنرل سبھاشیت مکھرجی کی قیادت میں فیڈریشن کے وفد نے وزیر کھیل وشواس کیلاش سارنگ سے جمعہ کے روز بھوپال میں ان کی رہائش گاہ پر ملاقات کر کے سال 2027 کی ایشین روئنگ چیمپئن شپ اور ایشین روئنگ کپ-1 کی میزبانی کے لیے بھوپال کی دعویداری پر تفصیلی بات چیت کی۔

اس دوران وفد نے وزیر سارنگ کو باضابطہ تجویز پیش کرتے ہوئے مدھیہ پردیش حکومت سے درخواست کی کہ ہندوستان کی جانب سے بھوپال کو میزبانی دلانے کے لیے ریاستی حکومت، روئنگ فیڈریشن آف انڈیا کے ساتھ شراکت داری کر کے ایشین روئنگ فیڈریشن کے سامنے مضبوط اور موثر دعویداری پیش کرے۔

وفد نے بتایا کہ بھوپال کا اپر لیک (بڑا تالاب) اپنی قدرتی خصوصیات، بین الاقوامی معیار کے مطابق روئنگ سہولیات، قومی مقابلوں کے کامیاب انعقاد کے تجربے اور ریاستی حکومت کے مسلسل تعاون کی وجہ سے ایشیا کے اس معتبر مقابلے کی میزبانی کے لیے ہندوستان کا سب سے مضبوط متبادل ہے۔ اس انعقاد سے ایشیا کے سرفہرست کھلاڑی، تکنیکی حکام اور کھیلوں کے منتظمین بھوپال آئیں گے، جس سے مدھیہ پردیش کے کھیلوں کے بنیادی ڈھانچے، سیاحت اور انتظامی صلاحیت کو عالمی سطح پر شناخت ملے گی۔

وزیر سارنگ نے کہا کہ بھوپال کو سال 2027 کی ایشین روئنگ چیمپئن شپ اور ایشین روئنگ کپ-1 کی میزبانی دلانے کے لیے مدھیہ پردیش حکومت ہر ممکن تعاون فراہم کرے گی۔ انہوں نے کہا کہ اگر یہ معتبر تقریب بھوپال کو ملتی ہے تو یہ ریاست کے لیے باعثِ فخر ہوگا اور اس سے اسپورٹس ٹورزم، مقامی معیشت، نوجوانوں میں روئنگ کے کھیل کے تئیں دلچسپی اور بین الاقوامی سطح پر مدھیہ پردیش کی شناخت کو نئی بلندی ملے گی۔

وفد نے مطلع کیا کہ ایشین روئنگ فیڈریشن کے ذریعہ سال 2027 کے ایونٹس کے لیے رکن ممالک سے میزبانی کی تجاویز طلب کی گئی ہیں۔ انتخاب کے عمل کے تحت تفصیلی بڈ ڈاکیومنٹ، تکنیکی پیش کش، جائے وقوع کا معائنہ اور مختلف مراحل کی رسمی کارروائیاں مکمل کی جانی ہیں۔ اس پورے عمل میں مدھیہ پردیش حکومت کا تعاون ہندوستان کی دعویداری کو مزید مضبوط بنائے گا۔

ہندوستھان سماچار

---------------

ہندوستان سماچار / انظر حسن