نئی دہلی، 24 جولائی(ہ س)۔ لوک سبھا میں قائدِ حزبِ اختلاف راہل گاندھی جمعہ کو جنتر منتر پر کاکروچ جنتا پارٹی(سی جے پی)کے احتجاج کے دوران زخمی ہونے والے طالب علم شاہد کو سونیا گاندھی کی رہائش گاہ پر میڈیا کے سامنے لے آئے۔ راہل گاندھی نے الزام لگایا کہ پُرامن احتجاج کے دوران طالب علم پر پیلیٹ گن کا استعمال کیا گیا، جس کے نتیجے میں اس کی ایک آنکھ شدید زخمی ہو گئی۔انہوں نے حکومت سے مطالبہ کیا کہ طلبہ پر ہونے والے مبینہ مظالم کی ذمہ داری قبول کی جائے، مرکزی وزیر تعلیم دھرمیندر پردھان کو عہدے سے ہٹایا جائے اور وزیراعظم نریندر مودی طلبہ سے عوامی طور پر معافی مانگیں۔

راہل گاندھی نے صحافیوں سے گفتگو کرتے ہوئے کہا کہ حکومت دعویٰ کر رہی ہے کہ احتجاج کے دوران پیلیٹ گن استعمال نہیں ہوئی، لیکن زخمی نوجوان خود اس دعوے کی حقیقت بیان کرتا ہے۔ انہوں نے شاہد کی جانب اشارہ کرتے ہوئے کہا کہ وہ ہاتھ میں ترنگا لے کر پُرامن احتجاج کر رہا تھا، اسی دوران اس پر پیلیٹ گن چلائی گئی، جس سے اس کی آنکھ بری طرح متاثر ہوئی۔ انہوں نے کہا کہ ابھی یہ بھی واضح نہیں کہ اس کی بینائی واپس آ سکے گی یا نہیں۔انہوں نے الزام لگایا کہ ہزاروں نوجوانوں پر لاٹھی چارج کیا گیا اور پیلیٹ گن کا استعمال کیا گیا، حالانکہ وہ صرف اپنے مستقبل اور امتحانی نظام میں شفافیت کا مطالبہ کر رہے تھے۔ راہل گاندھی نے کہا کہ جن نوجوانوں نے برسوں محنت کرکے پولیس بھرتی امتحان کی تیاری کی، بعد میں انہیں بتایا گیا کہ پرچہ لیک ہو گیا۔ ان کے مطابق جن کے پاس لاکھوں روپے تھے وہ سوالیہ پرچہ خرید سکے، جبکہ دیگر امیدواروں کے ساتھ ناانصافی ہوئی۔

راہل گاندھی نے کہا کہ والدین نے اپنی محنت کی کمائی سے بچوں کو تعلیم دلوائی تاکہ ان کا مستقبل روشن ہو، لیکن حکومت نے نوجوانوں کے مستقبل پر ضرب لگائی ہے۔

انہوں نے کہا کہ طلبہ کے صرف تین مطالبات ہیں: دھرمیندر پردھان کو عہدے سے ہٹایا جائے کیونکہ وہ پرچہ لیک اور موجودہ تعلیمی نظام کے لیے ذمہ دار ہیں، مظاہرین پر مبینہ پیلیٹ گن چلانے اور لاٹھی چارج کرنے والوں کے خلاف کارروائی کی جائے، اور وزیراعظم نریندر مودی اس واقعے پر طلبہ سے عوامی معافی مانگیں۔

راہل گاندھی نے مزید کہا کہ طلبہ کو ڈرانا دھمکانا بند کیا جائے اور ان کے جائز مطالبات تسلیم کیے جائیں۔ انہوں نے الزام عائد کیا کہ حکومت نوجوانوں کی آواز دبانے کی کوشش کر رہی ہے، جبکہ طلبہ صرف شفاف امتحانی نظام اور اپنے مستقبل کے تحفظ کا مطالبہ کر رہے ہیں۔

ہندوستھان سماچار

ہندوستان سماچار / Mohammad Khan