نئی دہلی، 24 جولائی (ہ س)۔ دہلی کے میئر کے دفتر کو جمعہ کی صبح ایک بار پھر بم سے اڑانے کی دھمکی موصول ہوئی۔ یہ دھمکی ای میل کے ذریعے دی گئی ، جس کے بعد دہلی پولیس اور دیگر سیکورٹی ایجنسیوں نے میئر کے دفتر کے احاطے کی جامع تلاشی لی۔ تاہم تلاشی کے دوران کوئی مشکوک چیز نہیں ملی۔

میئر کے دفتر کی طرف سے جاری کردہ معلومات کے مطابق، جمعہ کی صبح 10:23 بجے ایک گمنام ای میل کے ذریعہ دوپہر 1:11بجے بم دھماکے کی دھمکی دی گئی ۔ اطلاع ملنے پر میئر کے دفتر نے فوری طور پر دہلی پولیس اور متعلقہ سیکورٹی ایجنسیوں کو مطلع کیا، جس کے بعد سیکورٹی انتظامات سخت کر دیے گئے۔

اطلاع کے بعد دہلی پولیس اور دیگر سیکورٹی ایجنسیوں نے میئر آفس کمپلیکس کے اندر تمام حساس مقامات، داخلی اور خارجی راستوں اور دیگر اہم مقامات کی مکمل تلاشی لی۔ پورے کمپلیکس کی مکمل تلاشی لی گئی اور ضروری حفاظتی اقدامات کیے گئے۔ ابتدائی تفتیش کے دوران کوئی مشکوک چیز برآمد نہیں ہوئی۔

میئر کے دفتر نے کہا کہ یہ پہلی بار نہیں ہے کہ اس طرح کی دھمکی موصول ہوئی ہے۔ دفتر کو پہلے بھی تین سے چار بار بم کی دھمکیاں مل چکی ہیں۔ مسلسل دھمکیوں کے پیش نظر اس سے قبل میونسپل کمشنر کو ایک خط لکھ کر پورے معاملے کی مکمل تحقیقات کرانے اورمجرموں کی نشاندہی اور ان کے خلاف سخت قانونی کارروائی کی درخواست کی گئی تھی۔

میئر کے دفتر نے کہا کہ آئینی عہدوں پر فائز عوامی اداروں اور دفاتر کو اس نوعیت کی بار بار دھمکیاں سنگین تشویش کا باعث ہیں۔ ایسے واقعات میں جلد از جلد قصورواروں کی نشاندہی اور ان کے خلاف سخت کارروائی کرنا ضروری ہے تاکہ مستقبل میں ایسے واقعات کو دوبارہ رونما ہونے سے روکا جا سکے۔

ہندوستھان سماچار

ہندوستان سماچار / محمد شہزاد