مدھیہ پردیش کے نوجوانوں کے لیے چار بڑے شہروں میں فاسٹ ٹریک عدالتیں شروع ہوں گی، وزیر اعلیٰ نے کیا اعلان

۔ وزیر اعلیٰ نے پنا میں 184.83 کروڑ روپے کے ترقیاتی کاموں کا سنگ بنیاد رکھا اور افتتاح کیا

بھوپال، 24 جولائی (ہ س)۔ مدھیہ پردیش کے وزیر اعلیٰ ڈاکٹر موہن یادو نے نوجوانوں کے مفاد میں ان کی تعلیم اور روزگار سے متعلق معاملات کی سماعت کے لیے فاسٹ ٹریک عدالتیں قائم کرنے کا اعلان کیا ہے۔ مدھیہ پردیش کے چاروں بڑے شہروں- بھوپال، جبل پور، اندور اور گوالیار میں اس طرح کی فاسٹ ٹریک عدالتیں قائم کی جائیں گی-

وزیر اعلیٰ ڈاکٹر یادو نے یہ اعلان جمعہ کو پنا میں منعقدہ ترقیاتی کاموں کے افتتاح اور سنگِ بنیاد کے پروگرام میں کیا۔ انہوں نے کہا کہ وزیر اعظم مودی کی قیادت میں ہندوستان اپنی شاندار ثقافت اور ’وسودھیو کٹمبکم‘ کی راہ پر آگے بڑھتے ہوئے عالمی فلاح و بہبود کے لیے کوششیں کر رہا ہے۔ وزیر اعلیٰ نے کہا کہ اگلے سال پنا میڈیکل کالج کا افتتاح کیا جائے گا۔

پروگرام میں وزیر اعلیٰ ڈاکٹر یادو نے سماجی تحفظ پینشن اسکیم کے تحت 35 لاکھ سے زائد مستحقین کے کھاتوں میں سنگل کلک کے ذریعے تقریباً 210 کروڑ روپے کی رقم منتقل کی۔ انہوں نے علامت کے طور پر مختلف شعبوں کے ذریعے چلائی جانے والی اسکیموں کے مستحقین اور خود کفیل گرام پنچایتوں کو تعریفی اسناد پیش کیں۔ وزیر اعلیٰ ڈاکٹر یادو کو ’زرعی فلاحی سال‘ کی مناسبت سے حل پیش کر کے ان کا استقبال کیا گیا۔

وزیر اعلیٰ نے کہا کہ بندیل کھنڈ کی سرزمین بے مثال ہے۔ یہ مہاراج چھترسال، ویر آلہاادل کی سرزمین ہے۔ یہاں پنا میں زمین کے نیچے ہیرا نکلتا ہے، لیکن آہستہ آہستہ پانی کی کمی ہوتی گئی۔ لوگوں نے نقل مکانی شروع کر دی، جسے ہماری حکومت نے روکا۔ اب ہماری حکومت نے بندھیل کھنڈ کی خوشحالی کے لیے بھارت رتن قابلِ احترام اٹل بہاری واجپئی کے عزم کے مطابق بین ریاستی کین-بیتوا ندی جوڑو پروجیکٹ کا آغاز کیا ہے۔

انہوں نے کہا کہ مرکزی حکومت نے ایک لاکھ کروڑ کے اس پروجیکٹ کے لیے 90 فیصد رقم فراہم کرنے کی منظوری دی ہے۔ ندی جوڑو پروجیکٹ کسانوں کے لیے خوشحالی لائے گا۔ ریاستی حکومت نے طے کیا ہے کہ ایسے پروجیکٹوں کی زد میں اگر کسی کی زمین، مکان یا دکان آتی ہے تو اسے مناسب معاوضہ دیا جائے گا۔ اس پروجیکٹ سے بندھیل کھنڈ کی صورتِ حال بدلنے والی ہے۔ کسان اپنی زمین بیچنے کا خیال بھی دل میں نہ لائیں۔ زراعت کے معاملے میں یہ علاقہ اب پنجاب اور ہریانہ کو بھی پیچھے چھوڑ دے گا۔

وزیر اعلیٰ ڈاکٹر یادو نے پنا کے برہسپتی کنڈ میں 8 کروڑ کی لاگت سے خوبصورتی کے عمل کے تحت تعمیر شدہ گلاس فلور اور ویو پوائنٹ سمیت دیگر ترقیاتی کاموں کا افتتاح کیا۔ اس موقع پر انہوں نے کہا کہ پنا میں تعمیر کردہ یہ شیشے کے فرش والا ویو پوائنٹ یہاں کی سیاحت کو فروغ دے گا۔ اسے دیکھنے کے لیے ملک و بیرونِ ملک سے لوگ آئیں گے۔ یہاں کے قدرتی آبشار عالمی سطح پر سیاحتی مرکز بننے کی صلاحیت رکھتے ہیں۔

وزیر اعلیٰ نے پروگرام میں کل 184.83 کروڑ روپے کے ترقیاتی کاموں کا افتتاح اور سنگِ بنیاد رکھا۔ ان کاموں میں گنور اور پوئی کے 74 کروڑ روپے کی لاگت والے دو ساندیپنی اسکول شامل ہیں۔ وزیر اعلیٰ نے کہا کہ ساندیپنی اسکول ملک کے بہترین اسکولوں میں شمار ہوتے ہیں۔ ریاست میں عالیشان ساندیپنی اسکول بنائے گئے ہیں۔ یہ اسکول بھگوان شری کرشن اور سداما کی دوستی کی علامت ہیں۔ ساندیپنی اسکولوں میں بچوں کو معیاری اور اخلاقی تعلیم دی جا رہی ہے۔

وزیر اعلیٰ نے کہا کہ ریاستی حکومت نے محکمۂ پولیس میں تقریباً 10 ہزار نئی اسامیوں کی منظوری دی ہے۔ گزشتہ سال 8 ہزار اسامیوں پر بھرتیاں کی گئیں۔ ریاست میں کل ایک لاکھ سے زائد سرکاری عہدوں پر نوجوانوں کو ملازمت کے مواقع ملے۔ حکومت نوجوانوں کو روزگار سے جوڑنا چاہتی ہے۔ ریاستی حکومت سیاحت کے ذریعے نوجوانوں کو روزگار کی فراہمیاں یقینی بنا رہی ہے۔ بندیل کھنڈ میں صنعتی سرگرمیوں کو فروغ دیا جا رہا ہے۔ پنا میں ہزاروں کروڑ کی سرمایہ کاری آ رہی ہے۔ ساگر ڈویژن کے بینا میں ہی ریفائنری کی توسیع کا کام انجام پایا ہے۔ کھیت سے لے کر فیکٹری اور پھر برآمدات تک ہماری حکومت ہر شعبے میں کام کر رہی ہے۔

ہندوستھان سماچار

---------------

ہندوستان سماچار / انظر حسن