دہلی،24جولائی (ہ س)۔

آل انڈیا علماء بورڈ کے قومی ترجمان محمد عمر قاسمی نے دہلی میں اپنے جائز مطالبات کے حق میں پرامن احتجاج کرنے والے طلبہ پر کیے گئے لاٹھی چارج کی سخت الفاظ میں مذمت کی ہے۔

انہوں نے کہا کہ طلبہ ہمارے ملک کا مستقبل ہیں۔ لاکھوں نوجوان مختلف مسابقتی امتحانات کی تیاری کے لیے برسوں دن رات محنت کرتے ہیں، لیکن بار بار پرچہ لیک ہونے کے واقعات نے ان کی محنت، قیمتی وقت اور مستقبل کو شدید نقصان پہنچایا ہے۔ یہ نہایت تشویشناک صورتحال ہے، جس کی ذمہ داری حکومت کو قبول کرتے ہوئے امتحانی نظام کو مکمل طور پر شفاف، منصفانہ اور محفوظ بنانا چاہیے۔

محمد عمر قاسمی نے کہا کہ اپنے جائز مطالبات کے لیے پرامن احتجاج کرنا ہر شہری کا آئینی اور جمہوری حق ہے۔ ایسے میں طلبہ کی بات سننے کے بجائے ان پر طاقت کا استعمال کرنا مناسب نہیں۔ حکومت کو چاہیے کہ وہ طلبہ سے سنجیدگی اور ہمدردی کے ساتھ بات چیت کرے اور ان کے مسائل کا فوری اور منصفانہ حل نکالے۔

ہندوستھان سماچار

ہندوستان سماچار / Md Owais Owais