کولکاتا، 24 جولائی (ہ س)۔ مغربی بنگال میں زیر بحث رہے میونسپل بھرتی گھوٹالے میں انفورسمنٹ ڈائریکٹوریٹ (ای ڈی) نے اپنی تحقیقات تیز کر دی ہیں۔ جمعہ کو ترنمول کانگریس کے ایم ایل اے مدن مترا کی بیوی ارچنا مترا پوچھ گچھ کے لیے کولکاتا کے سی جی او کمپلیکس میں ای ڈی کے دفتر پہنچیں۔ ان کا چھوٹا بیٹا شبھ روپ مترا بھی ان کے ساتھ تھا۔

ارچنا مترا تقریباً 11:30 بجے ای ڈی کے دفتر پہنچیں۔انہوں نے میڈیا کے کسی سوال کا جواب نہیں دیا اور ہاتھ جوڑ کر سیدھی دفتر کے اندر چلی گئیں۔ای ڈی نے اس معاملے میں مدن مترا کے خاندان کے چار افراد کو مختلف دنوں میں طلب کیا ہے۔ بدھ کو چھوٹے بیٹے شبھ روپ مترا سے تقریباً نو گھنٹے تک پوچھ گچھ کی گئی، جب کہ جمعرات کو بڑے بیٹے سوروپ مترا ای ڈی کے سامنے پیش ہوئے ۔ وہیں، کمارہاٹی کے ترنمول ایم ایل اے مدن مترا کو 29 جولائی کو پوچھ گچھ کے لیے طلب کیا گیا ہے۔

ای ڈی کا الزام ہے کہ ٹیٹا گڑھ میونسپلٹی میں نقدی اور سونے کے بدلےکم از کم 125 لوگوں کو نوکریاں دی گئیں۔ اس تفتیش کے دوران مدن مترا کا نام سامنے آیا۔ 13 جون کو ای ڈی نے ان کے کئی مقامات پر چھاپے مارے اور ان سے پوچھ گچھ کی،جس کے بعد ان کی اہلیہ اور دو بیٹوں کو بینک دستاویزات کے ساتھ پیش ہونے کی ہدایت دی گئی۔

تحقیقاتی ایجنسی یہ جاننے کی کوشش کر رہی ہے کہ آیا میونسپلٹی میں تقرریوں کے عوض کوئی غیر قانونی مالی لین دین ہوا ہے۔قابل ذکر ہے کہ نہ صرف ای ڈی بلکہ گزشتہ سال اکتوبر میں مرکزی تفتیشی بیورو (سی بی آئی) نے بھی میونسپل بھرتی گھوٹالہ معاملے میں مدن مترا کے گھر کی تقریباً پانچ گھنٹے تک تلاشی لی تھی۔

اس دوران ، مدن مترا نے انفورسمنٹ ڈائریکٹوریٹ (ای ڈی) کی طرف سے ان کی بیوی اور دو بیٹوں کو طلب کیے جانے کے بعد گزشتہ ہفتے ترنمول کانگریس کے رتبرت بنرجی دھڑے میں شمولیت اختیار کی تھی۔ اس کے بعد انہوں نے وزیر اعلیٰ ممتا بنرجی اور ابھیشیک بنرجی کی کھلے عام تنقید کی۔

غور طلب ہے کہ ای ڈی اس بھرتی گھوٹالہ کے سلسلے میں پہلے ہی سابق وزیر سوجیت باسو کو گرفتار کر چکی ہے۔ جانچ ایجنسی نے سوجیت باسو اور ان کے بیٹے سمندر باسو کے خلاف عدالت میں چارج شیٹ بھی داخل کی ہے۔

ہندوستھان سماچار

ہندوستان سماچار / محمد شہزاد