نئی دہلی، 23 جولائی (ہ س)۔ ہندوستانی جوڈوکھلاڑیوں کو طویل عرصے سے جس کھیل کی ترقی کے مضبوط نظام کی ضرورت تھی،اس کے اثرات اب بین الاقوامی سطح پر نظر آنے لگے ہیں۔ اعلیٰ تربیت، سائنٹفک تیاری اور مسلسل تعاون کے نتیجہ میں چار ہندوستانی خواتین جوڈوکھلاڑیوں نے 2026 گلاسگو دولت مشترکہ کھیلوں کے لیے ہندوستانی ٹیم میں جگہ حاصل کرلی ہے۔

دولت مشترکہ کھیلوں کے لیے منتخب کیے گئے ایتھلیٹس میں یامنی موریہ (مدھیہ پردیش)، انّتی شرما (اتراکھنڈ)، اشروپ نارنگ (پنجاب) اور تکیلمبم انوگنبی (منی پور) شامل ہیں۔ ان چاروں نے پچھلے کچھ برسوں میں مسلسل مضبوط کارکردگی کے ذریعے قومی ٹیم میں اپنی جگہ مضبوط کی ہے۔

یہ کھلاڑی ایکسس بینک اور انسپائر انسٹی ٹیوٹ آف اسپورٹ (آئی آئی ایس) کے ذریعے چلائے جانے والے مشترکہ ایتھلیٹ ڈویلپمنٹ پروگرام کے تحت تربیت اور دیگر سہولیات حاصل کر رہے ہیں۔ اس اقدام کے ذریعہ آج تک 500 سے زیادہ کھلاڑیوں کی مدد کی گئی ہے، جن میں 471 جونیئر اور 53 ایلیٹ خواتین جوڈوکھلاڑی شامل ہیں۔

اس پروگرام سے وابستہ ایتھلیٹس نے قومی اور بین الاقوامی مقابلوں میں 140 سے زائد تمغے جیتے ہیں۔ مزید ، انہیں جاپان، جارجیا اور ازبکستان جیسے ممالک میں منعقد ہونے والے 11 بین الاقوامی تربیتی کیمپوں میں شرکت کرنے کا موقع ملا ہے، جس سے عالمی سطح کے مقابلے میں قابل قدر تجربہ حاصل ہوا ہے۔

ایکسس بینک کے گروپ ہیڈ وجے ملبگل نے کہا کہ صحیح ماحول اور اعلیٰ معیار کی تربیت فراہم کرنے سے کھلاڑیوں کی کارکردگی میں مسلسل بہتری آئی ہے اور دولت مشترکہ کھیل کے لیے چار کھلاڑیوں کا انتخاب اس سفر میں ایک اہم سنگ میل ہے۔

اس دوران، آئی آئی ایس کی صدر، منیشا ملہوترا نے کہا کہ انسٹی ٹیوٹ کا مقصد صرف کھلاڑیوں کی تربیت سے بالاتر ہے۔ اس کا مقصد انہیں بین الاقوامی سطح پر کامیابی کے لیے ضروری ہر وسائل فراہم کرنا ہے۔

ہندوستھان سماچار

---------------

ہندوستان سماچار / عبدالسلام صدیقی