گلاسگو، 23 جولائی (ہ س)۔ نوجوانوں کے امور اور کھیل اور محنت و روزگار کے مرکزی وزیر ڈاکٹر منسکھ منڈاویہ نے جمعرات کو اسکاٹ لینڈ کے گلاسگو میں ہندوستانی کمیونٹی کے ارکان کے ساتھ چیئر فار انڈیا پہل کے ایک حصے کے طور پر ایک سائیکل ریلی میں شرکت کی۔ انہوں نے فٹنس، صحت مند طرز زندگی اور کمیونٹی کی شراکت کو فروغ دیا اور 2026 دولت مشترکہ کھیلوں میں حصہ لینے والے ہندوستانی کھلاڑیوں کی حوصلہ افزائی کی۔

اس سائیکل ریلی میں بڑی تعداد میں ہندوستانی نژاد لوگوں نے شرکت کی۔ اس تقریب کا مقصد ہندوستانی کھلاڑیوں کی مدد کرنا اور لوگوں کو اپنی روزمرہ کی زندگی میں جسمانی سرگرمیوں کو اپنانے کی ترغیب دینا تھا۔ یہ پہل کھیلوں اور فٹنس کے ذریعے ہندوستانی باشندوں کے ساتھ مشغولیت کو مضبوط بنانے اور ایک فعال طرز زندگی کو فروغ دینے کے لیے مرکزی حکومت کی مہم کا حصہ ہے۔ ریلی کے دوران ڈاکٹر منڈاویہ نے شرکاءسے بات چیت کی اور فٹ انڈیا موومنٹ کے لیے ان کے جوش و جذبے کی تعریف کی۔

اس موقع پر خطاب کرتے ہوئے ڈاکٹر منڈاویہ نے کہا کہ ہندوستانی کھلاڑی 2026 دولت مشترکہ کھیلوں میں ملک کی نمائندگی کے لیے گلاسگو پہنچے ہیں اور یہ حوصلہ افزا ہے کہ ہندوستانی برادری چیئر فار انڈیا پہل کے تحت ان کی حمایت میں متحد ہے۔ انہوں نے کہا کہ یہ سائیکل ریلی دنیا کو یہ پیغام دیتی ہے کہ فٹنس ہر فرد اور ہر معاشرے کے لیے ضروری ہے۔ انہوں نے کہا کہ وزیر اعظم نریندر مودی کی جانب سے شروع کی گئی فٹ انڈیا موومنٹ کے تئیں ہندوستانی تارکین وطن کا جوش و خروش ظاہر کرتا ہے کہ دنیا کے مختلف ممالک میں رہنے کے باوجود وہ اس مہم سے جڑے ہوئے ہیں اور صحت مند طرز زندگی کو فروغ دینے کے لیے پرعزم ہیں۔

ڈاکٹر منڈاویہ نے کہا کہ وکست بھارت کی تعمیر اسی وقت ممکن ہے جب اس کے شہری صحت مند ہوں۔ انہوں نے تمام ہندوستانیوں سے اپیل کی کہ وہ فٹ انڈیا تحریک میں شامل ہوں اور ' وکست بھارت' کے مقصد میں اپنا تعاون دیں۔ انہوں نے سائیکلنگ کے بہت سے فوائد پر روشنی ڈالتے ہوئے کہا کہ یہ نہ صرف لوگوں کو فٹ رکھتا ہے بلکہ آلودگی، ٹریفک کی بھیڑ کو کم کرنے اور ماحولیات کے تحفظ میں بھی اہم کردار ادا کرتا ہے۔

ڈاکٹر منڈاویہ اس وقت 2026 کامن ویلتھ گیمز کے سلسلے میں گلاسگو کا دورہ کر رہے ہیں۔ اس دورے کے دوران وہ ہندوستانی کھلاڑیوں، عہدیداروں اور ہندوستانی کمیونٹی کے ارکان سے ملاقاتیں کررہے ہیں۔ یہ دورہ کھیلوں میں عمدگی کو فروغ دینے اور فٹ انڈیا تحریک کو عالمی سطح پر مضبوط کرنے کے لیے مرکزی حکومت کے عزم کی بھی عکاسی کرتا ہے۔

ہندوستھان سماچار

---------------

ہندوستان سماچار / عبدالسلام صدیقی