نئی دہلی، 23 جولائی (ہ س)۔ لوک سبھا میں قائد حزب اختلاف راہل گاندھی اور عام آدمی پارٹی (آپ) کے قومی کنوینر اروند کیجریوال نے پیپر لیک کے معاملات کی سماعت کے لئے فاسٹ ٹریک عدالتیں قائم کرنے کے وزیر اعظم نریندر مودی کے اعلان پر تنقید کی۔

راہل گاندھی نے جمعرات کو سوشل میڈیا پلیٹ فارم ایکس پر پوسٹ کرتے ہوئے کہا کہ وزیر تعلیم دھرمیندر پردھان اور حکومت نے مل کر ملک کے نوجوانوں کے مستقبل کو سب سے زیادہ نقصان پہنچایا ہے۔

گاندھی نے کہا کہ حکومت نے نہ صرف تعلیمی نظام پر مکمل قبضہ ہونے دیا اور اسے برباد ہونے دیا ،بلکہ اس کی حوصلہ افزائی بھی کی اور اس کے ذمہ دار ہر فرد کو تحفظ فراہم کیا۔ اپوزیشن لیڈر نے کہا کہ کانگریس نے حکومت کے سامنے تین مطالبات رکھے ہیں، پہلا دھرمیندر پردھان کو عہدے سے ہٹایا جائے، دوسرا وہ طلبہ سے معافی مانگیں اور تیسرا طلبہ کے خلاف تشدد کرنے والوں کے خلاف کارروائی کریں۔

دوسری جانب عام آدمی پارٹی کے کنوینر اروند کیجریوال نے سوشل میڈیا پر ایک ویڈیو شیئر کرتے ہوئے اسے طلبہ کی تحریک کو دبانے کی کوشش قرار دیا اور مطالبہ کیا کہ حکومت کو فاسٹ ٹریک کورٹ بنانے کے بجائے اس پورے پیپر لیک ریکٹ اور اس میں ملوث بڑے لوگوں کے خلاف سخت کارروائی کرنی چاہیے۔

اروند کیجریوال نے کہا کہ آج صبح وزیر اعظم نے پیپر لیک کے معاملات کے لیے فاسٹ ٹریک عدالتیں قائم کرنے کا اعلان کیا۔ انہوں نے مزید کہا کہ پوکسو اور عصمت دری کے مقدمات کے لیے کئی فاسٹ ٹریک عدالتیں پہلے ہی قائم کی جا چکی ہیں، لیکن ان میں سماعت تو ہوتی نہیں ہے۔

کیجریوال نے کہاکہ وزیر اعظم نے تمام باتیں کہیں، لیکن انہوں نے مرکزی وزیر تعلیم دھرمیندر پردھان کے استعفیٰ کی بات کیوں نہیں کی۔ کیجریوال غم کا اظہار کرتے ہوئے کہا کہ جنتر منتر پر احتجاج کے دوران طلبا کے ساتھ کئے گئے سلوک پر حکومت خاموش کیوں تھی اور کوئی بھی کارروائی کیوں نہیں کی گئی۔

اروند کیجریوال نے کہا کہ ہر سال پیپر لیک کا معاملہ سامنے آتا ہے لیکن وزیر اعظم نے ایک بھی ایسی بات نہیں کہی کہ اگلے سالنیٹ پیپر لیک نہیں ہوگا۔اپوزیشن نے حکومت سے دھرمیندر پردھان کے استعفیٰ اور تشدد کرنے والوں کے خلاف کارروائی کا مطالبہ کیا۔

ہندوستھان سماچار

ہندوستان سماچار / محمد شہزاد