شملہ، 23 جولائی (ہ س)۔ ہماچل پردیش میں گزشتہ تین چار دنوں سے ہورہی بارش جمعرات کو بھی جاری رہی۔ شملہ، سرمور، سولن، ہمیر پور سمیت کئی اضلاع میں صبح سے ہی وقفے وقفے سے بارش ہوئی۔ مسلسل بارش سے ندیوں اور برساتی نالوں میں پانی کی سطح بڑھ گئی ہے۔ کئی مقامات پر برساتی نالے افان پر ہیں۔ انتظامیہ نے لوگوں سے دریاوں، ندی نالوں اور برساتی نالوں سے دور رہنے کی اپیل کی ہے۔ نیز، ان سے کہا گیا ہے کہ وہ خراب موسم کے دوران غیر ضروری سفر سے گریز کریں اور خاص طور پر لینڈ سلائیڈنگ سے متاثر علاقوں میں محتاط رہیں۔

اگرچہ گزشتہ 24 گھنٹوں کے دوران ریاست میں بارش کی شدت گزشتہ دنوں کے مقابلے کم رہی، لیکن کئی مقامات پر اچھی بارش ریکارڈ کی گئی۔ محکمہ موسمیات کے مطابق بلاسپور ضلع کی نینا دیوی میں 56.2 ملی میٹر، مالراوں میں 49.4 ملی میٹر، کلو ضلع کے منالی میں 35.0 ملی میٹر، شملہ ضلع کے رام پور میں 30.3 ملی میٹر، بلاس پور کے برہمانی میں 29.4 ملی میٹر، ضلع سراہن میں 28 ملی میٹر،سرمور کے ناہن میں 27.8 ملی میٹر ، کلو کی کوٹھی میں 26.0 ملی میٹر، شملہ کے روہڑو میں 20.0 ملی میٹر اور کھدرالہ میں 19.1 ملی میٹر بارش ریکارڈ کی گئی۔

بارش کے باعث کئی مقامات پر لینڈ سلائیڈنگ بھی ہوئی ہے۔ ریاست بھر میں 250 سے زیادہ سڑکیں بند ہیں، جس سے کئی علاقوں میں ٹریفک میں خلل پڑا ہے۔ بعض مقامات پر بجلی کی فراہمی میں بھی خلل پڑا ہے، کئی ٹرانسفارمر سروس سے محروم ہیں۔ پینے کے پانی کی اسکیمیں بھی متاثر ہوئی ہیں جس سے بعض علاقوں میں پانی کی سپلائی متاثر ہوئی ہے۔ متعلقہ محکمے سڑکوں کی بحالی، بجلی کی فراہمی بحال کرنے اور پینے کے پانی کی اسکیموں کی مرمت کے لیے کام کر رہے ہیں۔

محکمہ موسمیات نے فی الحال کسی بھی دن کے لیے ریاست کے لیے ریڈ الرٹ جاری نہیں کیا ہے۔ ریاست کے بیشتر حصوں میں شدید بارش کے امکان کے درمیان ایلو الرٹ 29 جولائی تک جاری رہے گا۔ جمعرات کو کنور اور لاہول اسپتی کو چھوڑ کر باقی تمام دس اضلاع میں بھاری بارش کا ایلو الرٹ ہے۔ 24 جولائی کو چمبہ، کانگڑا اور سرمور اضلاع میں ایلو الرٹ رہے گا۔ 25 جولائی کو شملہ، منڈی، کلو، کانگڑا، چمبہ، بلاس پور، ہمیر پور اور اونا سمیت آٹھ اضلاع میں شدید بارش کی وارننگ جاری کی گئی ہے۔ 26 جولائی کو اونا، کانگڑا، سولن اور سرمور اضلاع کے لیے ایلو الرٹ ہوگا۔

محکمہ موسمیات کا کہنا ہے کہ مانسون بدستور متحرک ہے اور آئندہ چند دنوں تک ریاست کے کئی حصوں میں وقفے وقفے سے بارش کا سلسلہ جاری رہنے کی توقع ہے۔ شدید بارش والے علاقوں میں لینڈ سلائیڈنگ، پانی کی سطح میں اچانک اضافہ اور نشیبی علاقوں میں سیلاب کا خطرہ ہے۔ اس لیے لوگوں سے گزارش ہے کہ محکمہ موسمیات اور مقامی انتظامیہ کے مشوروں پر عمل کریں۔

ہندوستھان سماچار

---------------

ہندوستان سماچار / عبدالسلام صدیقی