گورکھپور، 22 جولائی (ہ س)۔ بھارتیہ جنتا پارٹی (بی جے پی) کی تنظیمی مہم کو نئی تحریک دینے کے مقصد سے، وزیر اعلی یوگی آدتیہ ناتھ نے بدھ کو گورکھپور کے بابا گمبھیر ناتھ آڈیٹوریم میں منعقدہ ریاست گیر بوتھ صدر کانفرنس کا افتتاح کیا۔ پنڈال میں پہنچنے پر بی جے پی کے عہدیداروں، عوامی نمائندوں اور کارکنوں نے وزیر اعلیٰ کا پرتپاک استقبال کیا۔وزیراعلیٰ کے آتے ہی پورے کیمپس میں جوش و خروش کی فضا چھا گئی۔

یہ کانفرنس بی جے پی کی ریاست گیر بوتھ کانفرنس مہم کا باضابطہ آغاز ہے۔ اس کے ذریعے پارٹی بوتھ کی سطح پر اپنی تنظیم کو مضبوط، فعال اور سرگرم بنانے کے لیے ایک جامع حکمت عملی کو نافذ کرے گی۔ کانفرنس میں بوتھ صدور کے کردار، تنظیمی توسیع، عوامی رابطہ مہم، مرکزی اور ریاستی حکومتوں کی عوامی فلاحی اسکیموں کو عام کرنے اور آئندہ انتخابات کی تیاریوں پر تفصیلی تبادلہ خیال کیا جائے گا۔

بوتھ ورکرس کو بی جے پی تنظیم کی سب سے اہم طاقت بتاتے ہوئے وزیر اعلیٰ یوگی آدتیہ ناتھ نے کانفرنس میں کہا کہ بوتھ سطح کے کارکنوں کی انتھک محنت، لگن اور عوامی رابطوں نے پارٹی کی ہر انتخابی کامیابی میں اہم رول ادا کیا ہے۔ انہوں نے کارکنوں پر زور دیا کہ وہ معاشرے کے ہر طبقے تک پہنچیں اور حکومت کی کامیابیوں اور ترقیاتی کاموں کو مو¿ثر طریقے سے ان تک پہنچائیں۔

انہوں نے کہا کہ بی جے پی تنظیم خدمت، گڈ گورننس اور قومی مفاد کے عزم کے ساتھ انتھک محنت کر رہی ہے۔ بوتھ جتنا مضبوط ہوگا، جمہوریت اتنی ہی مضبوط ہوگی اور تنظیم کی جڑیں اتنی ہی گہری ہوں گی۔ کارکنوں سے بات کرتے ہوئے وزیر اعلیٰ نے آئندہ انتخابات کے پیش نظر ہر بوتھ کو مزید فعال اور منظم بنانے پر زور دیا۔

اس کانفرنس میں بی جے پی کے رکن پارلیمنٹ روی کشن شکلا، ریاستی نائب صدر دھرمیندر سنگھ، علاقائی صدر ونود رائے کے علاوہ متعدد عوامی نمائندے، عہدیداران اور بوتھ صدور اور کارکنان کی بڑی تعداد موجود تھی۔ سبھی نے تنظیم کو مزید مضبوط کرنے اور پارٹی کی پالیسیوں اور حکومت کی کامیابیوں کو بوتھ سطح تک پہنچانے کے اپنے عزم کا اعادہ کیا۔

ریاست گیر بوتھ کانفرنس مہم کے آغاز کے ساتھ ہی بی جے پی نے تنظیمی سطح پر آئندہ انتخابی تیاریوں کو نئی تحریک دینے کا واضح پیغام دیا ہے۔ پارٹی قیادت کا ماننا ہے کہ ایک مضبوط بوتھ آرگنائزیشن ہی انتخابی کامیابی کی سب سے مضبوط بنیاد ہے اور اسی کی طاقت پر بی جے پی آئندہ انتخابات میں موثر کارکردگی کے ہدف کے ساتھ آگے بڑھ رہی ہے۔ قابل ذکر ہے کہ بی جے پی آج ہر اسمبلی حلقہ میں بوتھ صدر کانفرنسیں کر رہی ہے۔

ہندوستھان سماچار

---------------

ہندوستان سماچار / عبدالسلام صدیقی