مظفر پور کے ایس کے ایم سی ایچ میں مریض کی موت کے بعد اہل خانہ اور ڈاکٹروں کے درمیان مارپیٹمظفر پور، 22 جولائی (ہ س)۔ بہار میں مظفر پور کے سری کرشنا میڈیکل کالج اینڈ اسپتال (ایس کے ایم سی ایچ) کے ایمرجنسی وارڈ میں منگل کی دیر رات ایک مریض کی موت کے بعد ہنگامہ مچ گیا۔ مریض کے لواحقین اور ڈاکٹروں کے درمیان جھگڑا مارپیٹ میں تبدیل ہوگیا۔ دونوں طرف سے تقریباً تین افراد کے زخمی ہونے کی اطلاع ہے۔ واقعے کے بعد ایمرجنسی وارڈ کے باہر افراتفری مچ گئی اور مریضوں کے لواحقین اور اسپتال عملہ کی بڑی تعداد جائے وقوعہ پر جمع ہوگئی۔ متوفی 35 سالہ شبنم خاتون تھی جو رام باغ کی رہائشی تھی۔ اہل خانہ کے مطابق انہیں صدر اسپتال سے ریفر کرنے کے بعد منگل کو تشویشناک حالت میں ایس کے ایم سی ایچ کے ایمرجنسی وارڈ میں داخل کیا گیا تھا۔ علاج کے دوران ان کی حالت مسلسل بگڑتی رہی اور اسی رات ان کی موت ہوگئی۔موت کی خبر ملتے ہی اہل خانہ مشتعل ہوگئے۔ ڈاکٹروں کا الزام ہے کہ ایک خاتون نے پہلے ان کے ساتھ بدسلوکی شروع کی، پھر 20-15 لوگوں کو بلایا۔ وہ ڈاکٹروں کے چیمبر میں داخل ہوئے اور ایک ڈاکٹر کا گریبان پکڑ کر اس پر حملہ کیا۔ لواحقین کا الزام ہے کہ مریض کی موت ڈاکٹروں کی غفلت کے باعث ہوئی۔ ان کا کہنا ہے کہ واقعہ کے بعد ایس کے ایم سی ایچ کے کچھ طلبا وہاں پہنچے اور ان کے ساتھ مارپیٹ کی۔ اہل خانہ کا الزام ہے کہ ان پر ہاکی اسٹکس سے حملہ کیا گیا جس سے ان کے دو لوگ زخمی ہوگئے۔ ہنگامہ آرائی کی اطلاع ملتے ہی ایس کے ایم سی ایچ او پی اور احیا پور تھانہ کی پولیس جائے وقوعہ پر پہنچی۔ پولیس نے دونوں فریقین کو پرسکون کر کے حالات پر قابو پالیا۔ جس کے بعد لواحقین لاش لے کراسپتال سے چلے گئے۔ ایس کے ایم سی ایچ کے ڈپٹی سپرنٹنڈنٹ ڈاکٹر ستیش کمار نے بدھ کی صبح ایک انٹرویو میں کہا کہ معاملے کی تحقیقات کی گئی ہے اور ابھی تک خاندان کی طرف سے کوئی تحریری شکایت موصول نہیں ہوئی ہے۔ اسپتال انتظامیہ سے موصول ہونے والی ابتدائی معلومات میں ڈاکٹروں کی جانب سے کسی قسم کی غفلت کا انکشاف نہیں ہوا ہے۔ انہوں نے بتایا کہ خاندان نے ابتدائی طور پر ڈاکٹروں پر حملہ کیا۔ پورے معاملے کی چھان بین کی جا رہی ہے اور تحقیقاتی رپورٹ کی بنیاد پر مزید کارروائی کی جائے گی۔ہندوستھان سماچار
ہندوستان سماچار / Mohammad Afzal Hassan
