جاوید رانا، ستیش شرما نے راجوری کا دورہ کرکے سیلابی صورتحال کا جائزہ لیا
جموں، 22 جولائی (ہ س)۔ جموں و کشمیر حکومت میں جنگلات و قبائلی امور کے وزیر جاوید احمد رانا اور اسپورٹس، ٹرانسپورٹ اور دیگر محکموں کے وزیر ستیش شرما نے بدھ کے روز راجوری کا دورہ کر کے سیلابی صورتحال، امدادی کارروائیوں اور بنیادی خدمات کی بحالی کا جائزہ لیا۔ دونوں وزرا نے گورنمنٹ بوائز ہائر اسیکنڈری اسکول راجوری میں قائم امدادی و بازآبادکاری مرکز کا دورہ کیا اور وہاں منتقل کیے گئے متاثرہ خاندانوں سے ملاقات کر کے ان کی خیریت دریافت کی۔ انہوں نے متاثرین کو فراہم کی جانے والی رہائش، خوراک، پینے کے پانی، طبی سہولیات اور دیگر بنیادی خدمات کا بھی جائزہ لیا۔
بعد ازاں وزرا نے اراکین اسمبلی، ڈپٹی کمشنر راجوری ابھیشیک شرما اور ضلع و متعلقہ محکموں کے اعلیٰ افسران کے ساتھ جائزہ اجلاس منعقد کیا۔ اجلاس میں سیلاب سے متاثرہ علاقوں کی صورتحال، امدادی و بچاؤ کارروائیوں اور ضروری خدمات کی بحالی پر تفصیلی غور کیا گیا۔ اس موقع پر وزیر جل شکتی جاوید رانا نے 20 چھوٹی پانی سپلائی اسکیمیں قائم کرنے، 10 مقامات پر ٹرانسفارمر فراہم کرنے، ایک ہزار پانی ذخیرہ کرنے والے کریٹ، پانچ پانی نکالنے والے پمپ اور پانچ جنریٹر سیٹ فراہم کرنے کا اعلان کیا۔
انہوں نے سیلاب سے متاثرہ پانی سپلائی اسکیموں کی بحالی کے لیے چار کروڑ روپے مختص کرنے کا بھی اعلان کیا۔ ان اقدامات پر مجموعی طور پر تقریباً 12 کروڑ روپے خرچ ہوں گے۔ وزرا نے مشکل حالات میں امدادی اور بحالی کارروائیاں انجام دینے پر ضلع انتظامیہ اور متعلقہ محکموں کی کوششوں کو سراہا۔
ہندوستھان سماچار
--------------
ہندوستان سماچار / محمد اصغر
