احمد آباد/سورت،22جولائی(ہ س)۔ گجرات میں مانسون ایک بار پھر سرگرم ہو گیا ہے۔ محکمہ موسمیات نے ریاست کے مختلف علاقوں میں آئندہ چند روز تک موسلا دھار بارش کی پیش گوئی کرتے ہوئے متعدد اضلاع کے لیے الرٹ جاری کیا ہے۔ محکمہ موسمیات کے مطابق بدھ اور جمعرات کو جنوبی گجرات کے اضلاع نوساری اور ولساڈ کے مختلف علاقوں میں شدید سے انتہائی شدید بارش ہونے کا امکان ہے، جبکہ بعض مقامات پر انتہائی موسلا دھار بارش بھی ہو سکتی ہے۔ اس کے علاوہ سورت، ڈانگ اور تاپی اضلاع میں بھی موسلا دھار بارش کی پیش گوئی کی گئی ہے۔محکمہ نے بتایا کہ ریاست کے مختلف علاقوں میں آئندہ پانچ سے چھ روز تک بارش کا سلسلہ جاری رہ سکتا ہے، جس میں جنوبی گجرات کے اضلاع سب سے زیادہ متاثر ہونے کا خدشہ ہے۔ بارش کے پیش نظر گر سومناتھ، امریلی، بھاؤ نگر، بھروچ، نرمدا، تاپی، چھوٹا ادے پور، پنچ محل، داہود، بناس کانٹھا، مہسانہ اور سابر کانٹھا اضلاع کے لیے اورنج الرٹ جاری کیا گیا ہے۔ادھر جنوبی گجرات میں مسلسل بارش کے باعث متعدد دریا اور برساتی نالے طغیانی پر ہیں، جبکہ نشیبی علاقوں میں پانی جمع ہونے سے معمولاتِ زندگی متاثر ہوئے ہیں اور شہریوں کو آمد و رفت میں مشکلات کا سامنا کرنا پڑ رہا ہے۔انتظامیہ نے عوام سے اپیل کی ہے کہ غیر ضروری سفر سے گریز کریں، نشیبی علاقوں میں احتیاط برتیں اور محکمہ موسمیات کی جانب سے جاری کردہ ہدایات اور انتباہات پر عمل کریں۔ہندوستھان سماچار

ہندوستان سماچار / Mohammad Khan